Amăng hrơi kŏm, lan sang Sang hră muai Bình Minh, să Ea Na, tơring čar Dak Lăk ok or klao hok. Ƀing čơđai hur har hơmâo lăng tơlơi adoh suang, ƀong ƀañ trung thu hăng mă gơnam arăng ƀơk. Mô̆ H’Jun Hie Ksơr, 5 thun, čơđai hrăm anih Hla, lăi:“Hrơi anai kâo mơak biă mă yua hơmâo ƀing neh met brơi ƀañ kĕo kơ ƀing gơmơi. Gơmơi bơni kơ ƀing neh ƀing met hŏ”.

Jơlan hơdră ngui blan bơrơmi hăng anăn “Dik dak jua tlao - pơpha brơi tơlơi khăp pap” yua sang hră Trung cấp lý luận chíng trị A55A, Sang hră kơđi čar tơring čar Dak Lăk pơphun, hơmâo brơi 210 anung gơnam kơ čơđai sang hră. Yă Nguyễn Thị Lệ Nga, Khua sang hră muai Bình Minh brơi thâo:“Čơđai sang hră pơ anai leng kơ mơnuih djuai ania ƀiă soh, lu mơnuih lĕ amĭ ama djơ̆ khŏng. Ƀing ană amon pơ anai sang anŏ tơnap kơtang biă, hơdôm gơnam ƀơk brơi anai yơh pơtrut pran jua hăng ƀing nai, čơđai sang hră pơ anai”.

Hrŏm hrơi anai mơn, ƀơi ƀuôn Tuôr B, să Ea Na, bruă ngui blan bơrơmi kơ ƀing čơđai yua Hlăk ai tơring čar Dak Lăk ngă hrŏm brơi 75 anung gơnam kơ čơđai hăng sang anŏ ƀun rin.

Ƀu kơnong ƀơi să Ea Na đôč ôh, lu plơi pla pơ Dak Lăk hơdôm hrơi anai ăt mơak mơai, đik đak jua taih hơgor, apui kơđen dian jă ƀơ ƀlip, rơđah bơngač. Ƀơi să Ea Mdroh, 300 anung gơnam hơmâo brơi kơ ƀing čơđai pơ plơi ngă hơkrŭ tui jơlan hơdră Apui kơđen dian tŭi rơđah tơlơi hor. Bơ pơ ƀuôn Čư̆ Kŏ Êmông, Grup hlăk ai să Dang Kang ngă hrŏm hăng hơdôm grup djru khăp pap ngui ngor suang kơdăt ania čơgrai, rơyă sup ƀún riêu, yuă ƀuk brơi čơđai hăng brơi sung ao, gơnam hrăm hă, ƀơk gơnam trung thu kơ giăm 700 čô čơđai pơ 2 boh plơi ƀuôn Čư̆ Păm hăng Čư̆ Kŏ Êmông. 40 anung gơnam ăt hơmâo brơi mơn kơ sang anŏ ƀun rin.

Tơlơi ngui mơak blan bơrơmi ria ăt hơmâo mơn hăng ƀing čơđai Anom bruă Pơgang ba mơnuih mơnam hăng čơđai muai tơring čar Dak Lăk hăng jơlan hơdră ngui Mlăm blan bơrơmi ria yua Gơnong bruă ia jrao tơring čar pơphun. Ƀing čơđai hơmâo ngui pơkra apui kơđen dian, adoh suang, ƀong ƀañ kĕo hăng mă gơnam arăng ƀơk, mă prăk apah hrăm hră. Ơi Nguyễn Xuân Qúy, Khua anom bruă brơi thâo:“Thun anai Gơnong bruă ia jrao pơphun sa jơlan hơdră ngui ngor ƀơi Anom bruă pơgang ba mơnuih mơnam pơ tơring čar Dak Lăk laih anun pơ sa anih mơnuih ƀôn sang pơdong, hăng bruă ngui pơkra apui kơden dian, adoh suang, ƀong ƀañ kĕo. Jơlan hơdră anai ăt hơmâo ƀing juăt djru mơnuih tơnap ngă hrŏm, brơi gơnam, prăk hrăm hră kơ ƀing čơđai sang hră ƀun rin samơ̆ hrăm gir. Mơ̆ng anun čang rơmang bang hyu abih bang ƀing čơdai găn rơgao tơnap tap, jing mơnuih hrăm rơgơi, săng, jing ană tơčô Wa Hồ laih anun jing mơnuih thâo djru kơ mơnuih tơpuôl”.

Amăng jua hơgor mơñi ok or, jua puăi tlao hao hač, pah tơngan dor, tơlơi mơak ƀuh ƀơi ƀô̆ mơta ƀing čơđai. Adơi Nguyễn Thị Minh Châu lăi:“Prăp rơmet ngui trung thu lĕ gơmơi hơmâo pơtŏp adoh, suang, pơkra apui kơđen dian, suang kơdăt ania čơgrai. Kâo amuaih lăng arăng suang ania čơgrai, hơmâo arăng ƀơk gơnam. Truh kơ bơyan ngui blan bơrơmi kâo hơmâo tơlơi lăng ba mơ̆ng khul grup djru khăp pap, hăng mơ̆ng ƀing khua mua, brơi kâo lu gơnam yom mah anet hai, samơ̆ hăng pô kâo lăng gơnam anun ñu yom kơtang kơtit”.

Adơi Nguyễn Ngọc Hân hok mơak ră ruai:“Rim thun pơ anai lĕ neh met pơphun na nao yơh tơlơi ngui trung thu blan bơrơmi kơ ƀing gơmơi, hơmâo lu ƀañ kĕo, ƀong ƀañ hăng djă hyu apui kơđen dian. Gơmơi pơhrup hiam rim boh sang sa gru phara hăng pơkra mă apui kơđen dian či pơthâo brơi abih bang. Gơmơi ăt hrăm suang, hrăm adoh, tơlơi adoh suang mơ̆ng ƀing ayong ƀing amai lĕ Mời anh về Tây Bắc, bơ ƀing čơđai lĕ Trung thu xuống phố”.

Hơdôm gơnam ƀơk brơi, hơdôm tơlơi ngui ngor mơak hrŏm hăng amai Hằng wơ̆t hăng met Cuội jing ngă mơak pran jua ƀing čơđai tơnap tap drit druai pơ Dak Lăk. Ƀu kơnong hơmâo tơlơi mơak, hơdôm jơlan hơdă ngui ngor anai jing pơtrut tui pran jua kiăng ƀing čơđai gir run hrăm rơgơi, săng, tui./.