Jơnum EATOF thun anai hơdor glăi 20 thun akŏ pơjing Khul EATOF. Khua mua Khul jơnum bruă Tuai čuă ngui pơlir hơbit kual Đông Á lĕ khul ba tuai hyu ngui dưi akŏ pơjing  mơ̆ng thun 1999 ƀơi tơring čar Gangwon, dêh čar Hàn Quốc. Ră anai, Khul EATOF hơmâo 10 ding kơna kah hăng tơring čar Cát Lâm dêh čar Khač, Cebu dêh čar Philippines, Gangwon Hàn Quốc, Luang Prabang dêh čar Lao, tơring čar Quảng Ninh Việt Nam, Siêm Riêp dêh čar Kur, Sarawak dêh čar Malaysia, Tottori dêh čar Japan, Tuv dêh čar Mông Cổ hăng Yogyakarta dêh čar Indonesia.

Ơi Kim Jin Tae, Khua tơring čar gangwon, Hàn Quốc đĭ pơhiăp hơdor

glăi 20 thun akŏ pơjing EATOF

Bruă phun anăp nao mơ̆ng Khul anai, pơđĭ kyar bruă tuai čuă ngui hơđong kjăp amăng kual. Jơnum EATOF thun anai hăng akŏ ñu “Rŭ glăi bruă tuai čuă ngui kual Đông Á amăng rơnuk phrâo” lir hơbit hăng bruă hơdor glăi tal 20 thun akŏ pơjing Khul EATOF hrom hăng lu tơlơi jơnum mơak yôm pơkŏn pơtong rơđah hăng ngă kjăp tui tơlơi giăng mah, gơyut gơyâo djop tơring čar ngă ding kơna EATOF.