Mơguah lơ 28/11, ƀơi tơring čar Quảng Ninh, Jơnum min djop djuai ania mơnuih mơnam Việt Nam ngă hrŏm anom bruă djop djuai ania mơnuih mơnam dêh čar Khač, pơphun jơnum bưp nao rai giăng mah plah wah anom bruă djop djuai ania mơnuih mơnam Việt Nam hăng Khač laih anun anom bruă djop djuai ania mơnuih mơnam 7 boh tơring čar mơ̆ng Việt Nam hăng 2 boh tơring čar laih anun kual wai lăng mă pô gah dêh čar Khač hơmâo hrŏm sa jơlan guai dêh čar, tal dua thun 2023.

Hơdră jơnum bưp nao rai tal dua thun 2023 anai yôm biă mă amăng tal ƀrô hơdor glăi 15 thun akŏ pơjing bruă ngă hrŏm hlom bom plah wah dua bơnah dêh čar, pơtruh nao rai tal sa tŭ yua pơphun ƀơi tơring čar Vân Nam dêh čar Khač thun 2019. Ƀơi plơi prong Hạ Long, ƀing khua mua dua bơnah hơmâo jơnum hrŏm hrơi gum pơgôp djuai ania ƀơi plơi prong, nao ĕp lăng pơdah tơlơi adoh suang hrŏm mơak biă mă djă jă gru grua đưm mơ̆ng djuai ania pơ kual anai; nao jơnum ĕp lăng pơdă gơnam sĭ mơdrô djơ̆ hnong OCOP hmư̆ hing mơ̆ng tơring čar Quảng Ninh; ƀơi đang bơnga Hạ Long, khul hơmâo pla 75 phun bơnga, anăp nao hơdor glăi tal 75 thun hrơi akŏ pơjing bruă pơtom hiăp Việt Nam-Khač lơ 18/1/1950-lơ 18/1/2025.