Tui jơlan hơdră, mơguah hrơi anai Khua pơ ala mơnuih ƀon sang dêh čar nao dưm guang bơnga ƀơi pơsat jĕp Khua mir sir Hồ Chí Minh hlâo kơ mông jơnum prap lui kiăng bơkơtuai hăng pơsit tŭ yap jơlan hơdră amăng jơnum lok 4, Khua pơ ala mơnuih ƀon sang dêh čar tal XV. Mông pơphun sit nik amăng 9 mông mơguah ƀơi sang jơnum Diên Hồng - Ƀirô Khua pơ ala mơnuih ƀon sang dêh čar (Hà Nội) hăng hơmâo pôr pơhing, pơdah rup lăng nao rai mơng ataih kiăng mơnuih ƀon sang thâo.

Ƀing Khua pơ ala mơnuih ƀon sang dêh čar amra pơčrông sai hăng pơsit hơdôm boh tơhnal yôm amăng jơnum lok 4

Amăng jơnum anai, Khua pơ ala mơnuih ƀon sang dêh čar amra sem lăng, tŭ yap 7 črăn tơlơi phăn anun lĕ: Tơlơi phiăn hyuh gas (čih pơkra glăi); tơlơi phiăn pơgang ataih amăng sang anŏ (čih pơkra glăi); tơlơi phiăn pel ĕp kơđi (čih pơkra glăi); tơlơi phiăn Tần số vô tuyến điện; tơlơi phiăn khăm pơjrao (čih pơkra glăi); tơlơi phiăn pơgang yua prăk hơgŏm (čih pơkra glăi); Tơlơi pơtrun ba tơbiă tơlơi pơkă Jơnum Khua pơ ala mơnuih ƀon sang dêh čar (čih pơkra glăi). 3 črăn tơlơi pơtrun ăt hơmâo sem lăng tŭ yap, hơmâo: Tơlơi pơtrun ngă lông lăng tơlơi dưi jao mă yu mrô rơdêh ôtô tui hluai kiăng; tơlơi pơtrun ngă tui sa, dua hơdră bruă akŏ phun amăng pơđĭ kyar plơi prong Buôn Ma Thuột, tơring čar Dak Lak. Hrŏm hăng anun, Khua pơ ala mơnuih ƀon sang dêh čar amra pơphun krăo lăng; sem lăng, pơsit hơdôm bruă bơwih ƀong huă-mơnuih mơnam hăng sa, dua bruă akŏ phun pơkŏn amăng dêh čar.