Khua git gai Ping gah Nguyễn Phú Trọng nao pơhmư̆ hăng hơmâo tơlơi đĭ pơhiăp git gai yôm ƀơi mông Jơnum. Hăng hơdră bruă “Gum pơgôp - Mơnuih ƀôn sang ngă pô - Pơčeh phrâo - Ngă hrŏm - Đĭ Kyar” Jơnum ruah khua Khul mơnuih ngă hmua Việt Nam tal 8 hơmâo giăm 1 rơbâo čô khua sit nik, pơ ala brơi rơbêh 10 klăk čô ding kơna, mơnuih mă bruă amăng đơ đam dêh čar. ƀơi mông jơnum, ƀing khua pơƀut bơkơtuai, pơgôp hiăp kơ hơdôm hră pơ-ar yôm hơmâo: Hră lăi pơthâo lăng glăi bruă aka ƀu dưi ngă mơ̆ng Khul apăn bruă git gai Khul mơnuih ngă hmua Việt Nam tal 7; Lăi pơthâo hră pơtŏng glăi hơdôm tơlơi aka ƀu dưi ngă mơ̆ng Khul apăn bruă Khul mơnuih ngă hmua tal 7; Tơlơi phiăn ngă bruă mơ̆ng Khul mơnuih ngă hmua Việt Nam (pơhrua, pơkra glăi). Jơnum ăt bơkơtuai ĕp hơdră ngă bruă, tơlơi gơñăm kiăng ngă amăng rơwang bruă; ruah Khul khua apăn bruă rơwang thun 2023-2028. Amăng mông jơnum, ăt amra pơphun 10 wơ̆t bơkơtuai ĕp hơdră pơsir hĭ hơdôm bruă prong hăng bruă mă mơ̆ng khul mơnuih ngă hmua Việt Nam, pơƀut hơdôm tơlơi pơgôp hiăp, ba tơbiă tơlơi rơkâo đĭ đah mơ̆ng tum pơƀut glăi amăng hră pơ-ar Jơnum.

Pơhiăp git gai mông jơnum, Khua git gai Ping gah Nguyễn Phú Trọng kiăng djŏp gưl Khul mơnuih ngă hmua đơ đam dêh čar pơplih kơtang hloh dong hơdră ngă bruă, pơđĭ tui anŏ klă, tŭ yua ngă bruă; akŏ pơdong Khul mơnuih ngă hmua Việt Nam jai hrơi kjăp kơtang, sit nik jing anom bruă pơ ala brơi tơlơi dưi, tơlơi gêh gal lăp djơ̆ mơ̆ng mơnuih ngă hmua; pơtrut tui tơlơi gơgrong bruă ngă phun akha kơ bruă mă mơ̆ng mơnuih ngă hmua, pơtruh brơi mơnuih ngă hmua hăng Ping gah, Kơnuk kơna; jing mơnuih gum pơgôp prong amăng khul gum pơgôp djuai ania, pơlir hơbit “kông ñơn, mơnuih ngă hmua - ƀing rơgơi hră’.