VOV4.Jarai - Mơguah lơ 13/10, Jơnum ruah khua hlăk ai rơnuk Hồ Chí Minh tơring čar Gia Lai tal 15, rơwang bruă 2022-2027 hơmâo pơphun, hăng 250 čô mơnuih pơ ala brơi rơbêh 370 rơbâo čô khua mua hlăk ai mơng tơring čar. Hăng tơlơi pơtrun ngă bruă “Gum pơgôp - Kơsung nao hlâo - Ngă bruă hơdeč hmar - Pơčeh phrâo - Hrưn đĭ”, mông Jơnum hơmâo ba tơbiă 13 mơta tơlơi yôm phun kiăng ngă amăng thun 2022-2027.

Pơphun Jơnum khua mua hlăk ai rơnuk Hồ Chí Minh tơring čar Gia Lai tal 15

Sa amăng hơdôm tơlơi kiăng ngă lĕ ngă truh kih hơdôm hơbô̆ bruă, hơdră djru brơi ƀing hlăi ai ƀu kơjăp bruă, ƀu hiam drơi jăn; ngă klă bruă djru khăp pap, djru ba plơi pla đah mơng ngă hrŏ trun mrô sang anŏ rin hăng man pơdong plơi pla phrâo. Ayong Lê Trọng Phúc, Ding kơna gum bruă git gai Hlăk ai tơring čar Gia Lai, Khua Hlăk ai tơring glông Đức Cơ čang rơmang, mông jơnum amra djru kơ bruă hlăk ai djơ̆ hăng tơlơi kiăng mơng hlăk ai tơdăm dra amăng rơwang bruă phrâo.

Siu H’Mai: Pơblang