Mơguah lơ 24/8, ƀơi Sang jơnum prong ƀôn prong Hải Phòng (mrô sang 18 Hoàng Diệu, kuận Hồng Bàng, ƀôn prong Hải Phòng), Khul apăn bruă Ping gah, Khua pơ ala mơnuih ƀôn sang dêh čar, Khua mir sir, Kơnuk kơna, Jơnum min djop djuai ania mơnuih mơnam Việt Nam hăng sang anŏ hơmâo pơphun mông mơyut jôk yôm phăn pioh hơ-ŭ hơdor rơgŏm ơi Lê Văn Thành, Ding kơna Ping gah, Kơ-iăng Khua dêh čar tui hơdră mơyut jôk gưl Kơnuk kơna.

Drơi jăn atâo Kơ-iăng Khua dêh čar rơgŏm ơi Lê Văn Thành hơmâo klum hla kơ hơmâo dưm ƀơi anih yôm hloh ƀơi Sang jơnum prong ƀôn prong Hải Phòng. Pok blung mông mơyut jôk, ƀing khua mua amăng Khul apăn bruă Ping gah mut nao hơ-ŭ hrŏm hăng sang anŏ Kơ-iăng khua dêh čar Lê Văn Thành. Kiăo tui anun lĕ Khul khua mir sir, Kơnuk kơna, Khua pơ ala mơnuih ƀon sang dêh čar, Jơnum min djop djuai ania mơnuih mơnam Việt Nam mut nao hơ-ŭ ơi Lê Văn Thành.

Nao mơyut jôk Kơ-iăng khua dêh čar hơmâo ƀing khua mua hơđăp mơng Ping gah, Kơnuk kơna, ƀing khua mua mơng hơdôm ding jum, gơnong bruă, khul grup mơng gơnong glông hăng djop ƀon lan; hơdôm khul grup pơtom hiăp, gơyut gơyâo jar kmar.

Mông mơyut jôk kơ-iăng khua dêh čar Lê Văn Thành amra pơphun amăng 7 mông, lơ 26/8; mông ba nao dor Kơ-iăng khua dêh čar pơphun amăng hrơi anun mơn ƀơi pơsat plơi pla să Tân Liên, tơring glông Vĩnh Bảo, ƀôn prong Hải Phòng.