Anai lĕ sa amăng hơdôm jơlan hơdră, bruă mă čơkă mơ-ak pơdŏng tơring čar Lâm Đồng phrâo. Jơlan đuăi hmar Bảo Lộc – Liên Khương ataih giăm truh 74km, tô 2 plơi prong Bảo Lộc hăng Đà Lạt, găn hơdôm bôh tơring glông Bảo Lâm, Di Linh hăng Đức Trọng mơ̆ng tơring čar Lâm Đồng. Anai lĕ jơlan đuăi hmar tô nao rai hăng jơlan đuăi hmar Tân Phú – Bảo Lộc hăng Dầu Giây - Tân Phú, tô nao rai plơi prong Đà Lạt, tơring čar Lâm Đồng hăng ƀôn prong Hồ Chí Minh hăng hơdôm tơring čar Ngŏ Dơnung dêh čar, pơjing pran pơđĭ kyar kơ tơring čar Lâm Đồng phrâo.

Rơwang bruă hmâo prăk mă yua tal 1 rơbêh kơ 17.700 klai prăk, amăng anun hmâo rơbêh kơ 7.600 klai prăk mơ̆ng ngăn drăp Kơnuk kơna, dô̆ glăi prăk yua kơ pô tuh pơplai iâo pơhrui. Pơlir pô tuh pơplai Sang bruă bơwih ƀong mơnuih ƀôn sang tuh pơplai hăng pơđĭ kyar jơlan nao rai T&T - Sang bruă pơgôp tôm tuh pơplai Grŭp Phương Trang FUTA - Sang bruă pơgôp hrŏm prăk tuh pơplai pơdŏng pơkra jơlan nao rai Phương Thành dưi ruah pơkra jơlan, hăng nua ñu pơkă giăm truh 11.924 klai prăk, thun blan pơphun mă yua hăng bơwih ƀong 19 thun 10 blan. Tui kơčăo bruă, rơwang bruă pơkra jơlan amăng rơwang 30 blan./.