Anai lĕ, bruă ngă yom pơphăn biă mă amăng bruă kơđi čar, mơnuih mơnam hăng tơlơi khăp pap dơlăm hloh, pơdah rai pran jua ngă bruă “Abih amăng dêh čar anăp nao kơ kual guai dêh čar, yua kơñ pơgi tơlơi hơdip ƀing ană amon čơđai sang hră djuai ƀiă”. Khua dêh čar, ơi Phạm Minh Chính nao jơnum hrŏm hăng pơphun bruă či man pơdong ƀơi anih pơdah ƀô̆ mơta phun: sang hră đôm lăi dua gưl să Yên Khương, tơring čar Thanh Hoá. Lăi pơtong, ping gah, kơnuk kơna ta lăng yom biă mă bruă pơtô hăng pơjuăt kah hăng jơlan hơdră yom blung a, hăng tơlơi glăm ba, ngă atur kơ bruă akŏ pơdong laih anun pơđĭ kyar hiam tơlơi pơmin, pran jua, tơlơi thâo ană mơnuih, anŏ yom phun ñu kiăng pơsit kơ tơlơi tŭ yua, Khua dêh čar lăi, Ding jum kơđi čar hơmâo tŭ ư hrŏm hăng pơtum git gai pơčrâo trun ngă bruă brơi tuh pơ alin man pơdong sang hră đôm lăm gưl sa hăng gưl dua ƀơi 248 boh să ƀơi guai dêh čar či kơdư hang. Kiăng pơhlom, bruă man pơdong, ba yua sang hră anai amăng thun hrăm phrâo 2026-2027, Khua dêh čar rơkâo Ding jum Pơtô hăng pơjuăt, khua mua djop tơring čar khom sem lăng re se bruă mă, anih man pơdong, djop ring bruă kiăng hmao pơsir hĭ hơdôm tơlơi gun, kơđông amăng bruă mă, lăi pơthâo brơi sem lăng na nao tong ten anih anom dŏ ngă bruă, kiăng abih bang khut khăt pran jua gir run hloh pơđĭ kyar kơ bruă kiăng ană tơčô rơnuk pơ anăp klă hloh, hăng tơlơi khăp ƀu-eng pioh kơ čơđai rơnuk tơdơi yua kiăng pơđĭ kyar amăng kual plơi pla mơnuih djuai ƀiă tơring giăm guai dêh čar ƀing ta khăp ƀu-eng.

Ƀơi Dak Lak, kơ-iăng Khua dêh čar Mai Văn Chính nao ngă lơphet pơphun man pơdong sang hră kơnuk kơna čem rông ba gưl I hăng II ƀơi să giăm guai Ia Rvê, tơring čar Dak Lak. Amăng mông jơnum, Kơ-iăng khua dêh čar Mai Văn Chính hơmâo pơsit man pơdong sang hră hăng ƀơk gơnam brơi ƀing čơđai sang hră hăng nai pơtô, pơsur pran gir run găn rơgao tơnap tap, pơhlôm pơtô hrăm brơi klă hloh. Hrŏm hăng ring bruă ƀơi să Ia Rvê, amăng tal anai tơring čar Dak Lak pơphun man pơdong 2 boh sang hră pơlir djop gưl anun lĕ Sang hră pơlir djop gưl kơnuk kơna čem rông ba să Ia Lốp hơmâo prăk tuh pơ alin lĕ 105 klai prăk, sang hră pơlir djop gưl să Ƀuôn Đôn hơmâo tuh pơ alin rơbêh 158 klai prăk. Hơdôm boh sang prong dưi pơtô hrăm mơng 900 truh rơbêh 1.100 čô čơđai.

Ƀơi Lâm Đồng, Kơ-iăng khua dêh čar ơi Hồ Đức Phớc nao jơnum hrŏm bruă man pơdong sang hră đôm lăm dua gưl, gưl sa hăng gưl dua Thuận An. Sang hră anai phrâo hiam, amra jing anih dŏ hăng hrăm hră, čem rông ba rơbêh 1000 čô čơđai sang hră djop djuai ania amăng kual să giăm guai dêh čar Thuận An, tơring čar Lâm Đồng, hơmâo man pơdong ƀơi lŏn rơhaih 5 ha, rơnoh prăk tuh pơ alin lĕ225 klai prăk. Pơhiăp đĭ ƀơi mông jơnum, Kơ-iăng khua dêh čar ơi Hồ Đức Phớc lăi pơtong, Ping gah, Kơnuk kơna ta lăng yom biă mă bruă pơtô pơhrăm, jing jơlan hơdră khom ngă hlâo hloh ƀơi dêh čar, biă mă ñu hơdôm tơring kual tơnap tap, ataih, asuek jai kraih khom đing nao.

Kơ-iăng khua dêh čar rơkâo, Ding jum Pơtô hăng Pơjuăt hrŏm hăng tơring čar Lâm Đồng laih anun djop sang bruă pơdjơ̆ nao brơi man pơdong djơ̆ lăp, hmao kru hrơi blan pơkă, djơ̆ hnơ̆ng kơjăp hăng hơdôm tơlơi hơmâo pơdjơ̆ nao, biă mă ñu mơnuih apăn bruă, prăk kăk tuh pơ alin kiăng hơmâo boh tŭ yua sit nik, hơđong kơjăp truh rơtuh thun.