Ƀơi tơmeh gong pơkă guai dêh čar tơkuh klâo boh dêh čar, Khua ding jum ling tơhan klâo boh dêh čar ngă hrŏm lơphet kơkuh kơ, pia mia ia iom jă hloh lăi pơthâo pô guai lŏn ia; ĕp lăng bruă mă ngă hrŏm hyu tir hrŏm, sem lăng djop tơmeh gong pơkă guai dêh čar mơ̆ng ƀing ling tơhan klâo boh dêh čar; pla kyâo hơdor pioh bruă ngă giăng mah; ĕp lăng bruă mă pơtop hrăm pơjrao duăm ruă mơ̆ng nai ia jrao tơhan klâo boh dêh čar.

Thiếu tướng Nguyễn Trường Giang, Khua anom bruă nai ia jrao tơhan, gah anom bruă čem rông tơhan dêh čar brơi thâo, hăng tơhnal pơkă pơtop hrăm Pơphun djru pơklaih hăng pơjrao brơi mơnuih hơmâo tơlơi truh yua lŏn adai ngă, lŏn pơpư̆ čư̆ mơgơi, ƀing tơhan, nai ia jrao tơhan klâo boh dêh čar hơmâo pơđĭ tui tơlơi thâo kơhnâo kơhnăk bruă mă git gai, pơtum bruă mă, gum hrŏm djru pơklaih hăng pơjrao mơnuih ruă nuă hăng tơlơi khăp pap.