Jơnum tal anai pơƀut lăi nao dua mơta bruă prong, anun lĕ hơdôm bruă prăp rơmet Jơnum ruah khua ping gah dêh čar tal 14 hăng hơdôm mơta bruă akŏ pơdong Ping gah hăng anom bruă čar. Pơhiăp pok pơphun mông jơnum, Khua git gai Ping gah ơi Tô Lâm lăi dlăm, Jơnum anai, Khul khua apăn bruă phun git gai Ping gah amra pơgôp hiăp kơ mrô khua ngă Ding kơna Ding jum kơđi čar, Ding kơna Khul khua git gai bruă rim hrơi mơ̆ng ping gah tal 14 hăng bruă ruah mơnuih mut ngă bruă amăng Ding jum Kơđi čar, Khul khua git gai bruă rim hrơi mơ̆ng Ping gah tal 14.

Anai jing bruă yom biă mă, jing phun atur yua dah djŏp bruă leng kơ yua ană mơnuih ta soh pơsit. Pơƀuh mơnuih ngă bruă amăng Khul git gai phun mơ̆ng Ping gah kiăng git gai pok pơhai ngă djŏp bruă prong, khut khăt biă mă či pơđĭ kyar lŏn ia amăng rơnuk phrâo, anun kiăng khŏm ngă tong ten, tơpă sit, kơđiăng hloh. Khua git gai Ping gah lăi, rơngiao kơ hơdôm hơnong pơkă ruah tui tơlơi pơkă phrâo hăng ƀing ding kơna Ping gah gơnong dlông mơ̆ ƀing ta ba tơbiă ƀơi mông Jơnum Ping gah dêh čar tal 12 hăng 13 phrâo rơgao, bruă ruah khua amăng Ding jum Kơđi čar, Khul khua git gai bruă rim hrơi mơ̆ng Ping gah tal 14 kiăng lăi nao dong hơdôm tơlơi kiăng yom, djơ̆ lăp hăng rơnuk hơkrŭ phrâo mơ̆ng Ping gah, lŏn ia ta.