VOV4.Jarai - Mơguah lơ 3/10, ƀơi Ƀirô Ping gah, Jơnum lok 6 Khul apăn bruă Ping gah dêh čar tal 13 sit nik pơphun tui tơlơi git gai mơng Khua git gai Ping gah dêh čar ơi Nguyễn Phú Trọng. Khua git gai Ping gah dêh čar rơkâo 5 mơta bruă kiăng Khul apăn bruă Ping gah pơčrông sai.

Khua git gai Ping gah dêh čar ơi Nguyễn Phú Trọng đĭ pơhiăp amăng mông jơnum

Amăng anun, bruă blung hlâo lĕ sem lăng tơlơi bơwih ƀong huă-mơnuih mơnam, ngăn drăp kơnuk kơna thun 2022, akŏ bruă pơđĭ kyar bơwih ƀong huă - mơnuih mơnam, ngăn drăp Kơnuk kơna thun 2023, Khua git gai Ping gah dêh čar ơi Nguyễn Phú Trọng rơkâo, gơnong glông kơsem min tong ten hră lăi pơthâo, hră mơ-it mơng Khul apăn bruă Ping gah hăng tơlơi sit nik ƀơi ding jum, gơnong bruă, ƀon lan, đing nao pơčrông sai, sem lăng tong ten hơdôm anŏ yôm amăng thun 2022, ngă rơđah hơdôm boh tơhnal dưi ngă; hơdôm anŏ aka ƀu klă, tơlơi him lăng pơ anăp. Đing nao pơlăng nao rai hơdôm hơnong pơkă, bruă jao hơmâo ba tơbiă amăng pơgang, pơgăn kjăp hloh klin kman, kiăng hơkrŭ glăi, pơđĭ kyar bơwih ƀong huă-mơnuih mơnam, sit biă ñu pơgăn hŭi prăk kak trun nua, hơđong tơlơi bơwih ƀong huă djop mơta, pơhlôm brơi tơlơi hơdip kơ mơnuih ƀon sang.

VOV/Siu Đoan: Pơblang