Ƀrô̆ djơ̆ 1 mông čơtlăm, Mông lăi pơthâo kơ Khua git gai Ping gah ơi Nguyễn Phú Trọng dưi pơphun yôm phăn ƀơi Sang pioh atâo dêh čar mrô 5 Trần Thánh Tông, Hà Nội. Tơdơi kơ jua brô̆ hơgor Việt Nam dưi tơ-oa đĭ, Khua mir sir dêh čar ơi Tô Lâm pơ ala kơ khua git gai Ping gah, Kơnuk kơna pơđok tơlơi hơdor kơ Khua git gai Ping gah ơi Nguyễn Phú Trọng.

Khua mir sir ơi Tô Lâm lok glăi laih tơlơi hơdip, bruă mă ngă hơkrŭ lu mơta, kơjăp phik, Nai tha prin, Nai prin tha, Khua git gai Ping gah ơi Nguyễn Phú Trọng hăng bôh thâo dơlăm, hmâo pioh glăi laih kơ abih bang Ping gah, abih bang mơnuih ƀôn sang hăng abih bang ling tơhan lu tơlơi pơmin hăng pơblang yôm phăn kơ jơlan ngă hơkrŭ Việt Nam amăng rơnuk phrâo.

Gir mă yua pơčeh phrâo mơ̆ng Mac-Lênin, tơlơi pơmin Hồ Chí Minh, hăng tơhnal rơngai djuai ania hăng kơnuk kơna djop mơnuih dưm kơnar, pô kơsem min tơlơi pơmin Nguyễn Phú Trọng, khăn gru pơblang mơ̆ng Ping gah hmâo ngă rơđah tơlơi pơblang kơ djop mơnuih dưm kơnar hăng jơlan nao truh djop mơnuih dưm kơnar ƀơi Việt Nam, bruă mă mơ̆ng Ping gah, bruă bơwih ƀong sĭ mơdrô pơsit jơlan gah djop mơnuih dưm kơnar...

Kông ngăn yôm phăn anun hmâo hơkrŭ đĭ laih pran đăo kơnang kơtang tit kơ jơlan nao truh djop mơnuih dưm kơnar, djru yôm phăn kơ tơlơi pơđĭ kyar mơ̆ng bruă pơphun cộng sản ƀơi rŏng lŏn tơnah, pơđĭ kyar kơnuk kơna Mac-Lenin, tơlơi pơmin Hồ Chí Minh amăng rơnuk anai. Khua mir sir dêh čar ta pơtŏng sit: Nao hiam kơ ih Khua git gai, abih bang Ping gah, abih bang mơnuih ƀôn sang, abih bang ling tơhan sa pran jua ngă tui tơlơi čang rơmang mơ̆ng Ih, abih ai hơtai, abih pran jua mă bruă Lŏn ia, bơwih kơ mơnuih ƀôn sang, ngă tui truh kih tơhnal pơkă pơdŏng lŏn ia Việt Nam rơnuk rơnua, rơngai, pơlir hơbit, tơpă, pơdrŏng kơtang, thâo rơgơi, yâo mơ-ak.

Krep 1 mông 30 mơnit tlam pơphun mông pơyua. Khua mir sir ơi Tô Lâm, Khua dêh čar ơi Phạm Minh Chính, Khua git gai pơ ala mơnuih ƀôn sang dêh čar ơi Trần Thanh Mẫn, Ding kơna Khul git gai Ping gah ơi Lương Cường hrŏm hăng lu khua mua, khua apăn bruă Ping gah, kơnuk kơna hơđăp hăng khua mua hơdôm boh dêh čar hơmâo rơbah dua bơnah bong Khua git gai Ping gah dêh čar ơi Nguyễn Phú Trọng, ba nao ƀơi pơsat Mai Dịch, Hà Nội.

Truh 3 mông tlam lĕ mông dor Khua git gai Ping gah dêh čar ơi Nguyễn Phú Trọng hơmâo pơphun ƀơi pơsat Mai Dịch, Hà Nội.

Hăng pran jua hning rơngŏt, pơ ala brơi Khul pơphun mơyut jôk gưl dêh čar hăng sang anŏ Khua git gai Ping gah dêh čar ơi Nguyễn Phú Trọng, ơi Lương Cường, Ding kơna Ding jum kơđi čar, Ding kơna Khul git gai Ping gah, Khua khul pơphun mơyut jôk gưl dêh čar đĭ pơhiăp pơpŭ bơni ƀing khua mua hăng mơnuih ƀôn sang: “Pơ ala brơi Khul pơphun mơyut jôk hăng sang anŏ Khua git gai Ping gah dêh čar ơi Nguyễn Phú Trọng, ñu pơpŭ bơni ƀing khua mua, khua apăn bruă Ping gah, kơnuk kơna, Jơnum min djop djuai ania mơnuih mơnam Việt Nam hơđăp;

Ƀing khua mua mơng tač rơngiao hăng mơnuih ƀôn sang đơ đam dêh čar, hơdôm khul ling tơhan, ƀing rơgơi kơhnâo, ƀing khua khul đăo, hơdôm grup pơtom hiăp, ƀing pơ ala brơi khul grup amăng jar kmar hơmâo rai mơyut jôk, mơ-it guang bơnga, tơlơi tơña bla, rai hơ-ŭ hơdor, hơmâo rai pơyua ba nao dor rơgŏm ơi Nguyễn Phú Trọng, Khua git gai Ping gah Cộng sản Việt Nam”.