Kơnong kơ gư̆ tut mă amuñ đôč ƀơi telephôn rơgơi, mah dŏ pơ sang hă pơ đang kơphê, ơi Y Minh Niê, dŏ pơ ƀuôn H’Đing, să Ea Tul, tơring čar Dak Lăk ăt thâo mơn tla prăk kmơk, ia jrao ƀudah tla prăk apui prăk ia. Tui hăng ơi Y Minh, hăng app sang bruă prăk hơmâo pơmut amăng telephôn rơgơi, kơnong kiăng hơmâo internet, ta ƀu kơnong dưi tla prăk amuñ đôč ôh ăt hơmâo lu bruă bơwih brơi gah prăk kăk hăng nua apah ñu rơgêh, đa brơi yua đôč:“Hlâo adih aka ƀu hơmâo app lĕ ta nao tơl sang bruă prăk mơtăm, bơ tơdơi anai lĕ ta mơ-it prăk ƀơi telephôn rơgơi jing amuñ hloh. hơmâo app sang bruă prăk ta huăi rơngiă hrơi mông, huăi glêh nao rai, dŏ pơ sang hai ăt dưi mơit prăk mơn”.

Bơ hăng yă Nguyễn Thị Mỹ, sang sĭ mơdrô gơnam man pơdong, bơwih brơi bruă ngui ngor ƀơi thôn 5, să Ea Tul, yua hơmâo boh thâo mrô mơ̆ng sang bruă prăk, bruă tla prăk amuñ hloh, thâo krăo lăng prăk mut tơbiă rơđah rơđông, biă ñu ƀu kiăng djă ba prăk mơta ôh ăt dưi mơ-it prăk amăng the kak mơn, lăng anun kah hăng kơdung pioh prăk anet. Yă Mỹ ăt jing “tuai jê̆ giăm” hăng sang bruă prăk hăng prăk čan rơbêh 4 klai prăk:“Čan prăk mơ̆ng sang bruă anai  kraih 10 thun anai laih, Agribank djru brơi čan prăk bơwih ƀong. Hră pơ-ar ngă amuñ, tañ, brơi prăk pơmut amăng mrô djă prăk tañ mơn. Hlâo adih ta nao tla prăk kơmlai pơ sang bruă hlao, bơ ră anai ta mơit amăng mrô djă prăk đôč, pơhmutu lơ 30 tla prăk kơmlai lĕ năng ai lơ 25 kâo mơ-it nao yơh”.

Ƀu kơnong hơjăn đôč ôh čan, hơdôm anom ngă ƀong hrŏm, anom mơdrô prong ngă hmua ăt tŭ mă tơlơi gêh gal mơ̆ng boh thâo mrô. Bruă pơtruh sang bruă prăk hăng anom bruă mă jia, anom bruă wai lăng nao rai hăng čar rơngiao, sang prăk djru anom mơdrô mơ-it tla prăk tañ, rơđah rơđông, plai mơn rơngiă prăk apah. Amai Triệu Thị Hạnh, anom ngă ƀong hrŏm ngă hmua hăng bơwih bơwang Bình Minh, să Čư̆ M’gar brơi thâo:“Rơngiao kơ pô jŭ yap prăp, gơmơi lăng app anai klă, gêh gal biă, gơmơi ƀu kiăng nao pơ sang bruă prăk na nao dong tah, dưi ngă djŏp bruă ƀơi app hlao, dŏ mă bruă pơ kông ti ăt dưi ngă mơn”.

Pơsit boh thâo mrô jing bruă yom phun kiăng dưi pơhno, hơdôm sang bruă prăk ƀơi tơring čar Dak Lăk glăk pơtrut pơtô brơi mơnuih ƀôn sang, anom mơdrô mă yua boh thâo mrô, laih dong pơkra djơ̆ hră pơ-ar mơ̆ng tuai mut hrŏm hăng glông djă pioh hră pơ-ar dêh čar kơ anih dŏ plơi pla. Ơi Huỳnh Công Sự, Kơ-iăng khua sang bruă prăk Agribank ƀơi Čư̆ M’gar, brơi thâo:“Agribank ƀơi Čư̆ M’gar lăi pơthâo kơ ƀing tuai bruă brơi čan hăng mă hnưh tui app E-banking, djru tuai pơkrem prăk, huăi rơngiă mông, hlong tla mă pô. Hăng sang bruă prăk lĕ plai mơn prăk ngă hră, huăi rơngiă mông nao rai sem lăng, kĭ hră hăng hơdôm mơta prăk pơkŏn dong, pơđĭ tui tŭ yua bruă mă, djru kơ sang bruă prăk pơhrui prăk djơ̆, djŏp, tañ”.

Hrŏm hăng ba boh thâo ia rơgơi mă yua, hơdôm sang bruă prăk ăt pơđing nao bruă pơtô mă yua boh thâo mrô kơ ƀing khua, ngă hrŏm hăng hơdôm anom bruă kơnuk kơna či akŏ pơdong anih mă yua boh thâo mrô abih bang ƀơi tơring. Yă Vũ Mai Sa, Kơ-iăng khua Agribank pơdong pơ Kơdư Dak Lăk brơi thâo:“Ƀing gơmơi pok pơhai hơdôm gơnam bơwih brơi mă yua app phrâo, pơđĭ tui anih pơdong CDM/ATM pơ hơdôm boh plơi pla, kual ataih yaih. Pơkra djơ̆ hrŏm anăn păn, tơlơi pơhing mơ̆ng ƀing tuai, lăng ƀô̆ mơta djơ̆ krĕp hăng glông djă pioh dêh čar kơ mơnuih dŏ amăng plơi pla. Pơplih hơbô̆ bruă, mơit, tla prăk ƀơi sang bruă jing ngă mơ̆ng ataih, mă yua hơdôm tơlơi bơwih hơmâo amăng plang mrô, tuai dŏ pơpă tŭ mơn, mông bơi tŭ mơn ăt dưi ngă soh”.

Pơplih boh thâo mrô glăk jing tơlơi gêh gal yom kiăng sang bruă prăk Dak Lăk pok prong anih bơwih brơi prăk kăk, djru mơnuih ƀôn sang amăng plơi dưi čan, tla prăk hăng wai lăng prăk gêh gal hloh. Ƀu kơnong “tơl tơngan” neh met wa, sang bruă prăk mrô ăt gum hrŏm hăng mơnuih ngă hmua pơkra gơnam pơplih phrâo, djru ngă djơ̆ tơlơi kiăng pơplih boh thâo dêh čar, pơđĭ kyar bơwih ƀong mrô truh pơ plơi pla.