Anai jing hơdôm grup pơplông hơmâo ruah hăng hơmâo mă pri prong amăng hrơi pơplông pơ tơring glông hlâo kơ anun. Hơdôm grup hơmâo pơplông 3 wơ̆t, anun lĕ pơƀuh grup lăi pơthâo anăn, hơduah ĕp tơlơi thâo rơgơi, pơsir bruă yua ƀing čŏm puang ba tơbiă hăng pơplông ngă sen.

Hăng tơlơi pơplông hơmâo pơdah hăng tơlơi adoh suang ngă sen, rim tơlơi pơplông, hơdôm grup khŏm lăi pơthâo kơ plơi pla ñu, anom bruă ping gah, anom bruă gơñu glăk mă, mơnuih amăng grup; hơdôm tơlơi ƀing gơñu dưi ngă amăng bruă iâu pơthưr pơtô ba mơnuih ƀôn sang amăng anom bruă, plơi pla gơñu. Pơsir hĭ tơlơi hơmâo bơdjơ̆ nao bơrơsua lŏn tơnah, bơrơdjơ̆ sao amăng plơi pla; bruă djru djuai ania, djru tơlơi đăo; bruă čuk pơkra anih anom, duh prăk lŏn tơnah; tơlơi dưi mơnuih ƀôn sang; pơsir hĭ bruă ngă kơđi pơƀut lu mơnuih, tơlơi pơhiăp hơdip hrŏm mơ-ak amăng anom bruă hăng lơ̆m bưp mơnuih ƀôn sang.