Tal ia ling dăo kơtang aka ƀu hơmâo djơ̆ ôh, tal anai lip abih 34 boh să, phường ƀơi tơring čar Dak Lak, amăng anun răm ƀăm kơtang hloh lĕ hơdôm anih ƀơi Đông Hòa, Hòa Xuân, Hòa Thịnh, Hòa Mỹ….Lơ̆m ia hrŏ ƀiă, mơnuih ƀôn sang hăng djop ling tơhan anom bruă kơnuk kơna, tơhan blah ngă, tơhan kông an, khul grup tơdăm dra ƀơi kual plơi pla tơgŭ ngă bruă kih rơmet, djah djâo, dơlut hlŭ, pruih ia jrao pơdjai kman, hyu duñ djah djâo, kiăng rŭ glăi bruă mă, djru tơlơi hơdip mơda, kiăng tañ hơđong bơwih ƀong huă.

Tơlơi jŭ yap phrâo hloh lĕ, mơ̆ng jơnum min mơnuih ƀôn sang tơring čar Dak lak brơi thâo, đơ đam tơring čar hơmâo 55 čô mơnuih djai, 10 čô rơngiă, rơbêh 150.000 boh sang ia ling dăo, rơbêh 120 boh sang dlưh hlao ƀudah răm abih; rơnoh răm rai jŭ yap mă jăng jai truh 5.500 klai prăk. Khua git gai ping gah tơring čar, ơi Lương Nguyễn Minh Triết lăi pơtong, kual gah ngŏ tơring čar ia hrŏ abih laih, tơring čar git gai djop sang bruă ling tơhan tañ nao djru ba mơnuih ƀôn sang, ngă hrŏm pơpha bruă mă djru tơlơi khăp pap, laih dơ̆ng kih rơmet ngă pơrơgoh anih hơdip jum dar, boh nik ñu sang hră, sang ia jrao kiăng tañ bơwih brơi kơ mơnuih ƀôn sang pơwơ̆t glăi mă bruă.

Tlam lơ 23/11, ƀơi tơdrun kom păn Quy Nhơn, hơdôm pluh čô khua, ling tơhan Khul tơhan ia rơsĭ pơgang guai mrô 2 hăng Puih kơđông pơgang guai tơdrun kom păn Quy Nhơn ječ ameč yong glăm 120 tơn braih yua Anom pơđom pioh dêh čar djru kơ mơnuih ƀôn sang Gia Lai bưp tơlơi truh ia dăo.

Hrŏm anun mơn, ƀơi să Ngô Mây hăng Cát Khánh, 20 čô khua, ling tơhan Puih kơđông tơhan pơgang guai Cát Khánh ngă hrŏm hăng gong gai să pơdŭ pơgiăng, pơpha brơi 15 boh rơdêh pơgiăng braih huă añăm ƀong, sum ao, ia jrao nao pơ hơdôm boh plơi Chánh Hữu, Chánh Định, Chánh Hội hăng Vân Trim, pơhlom tañ, hmao kru, djơ̆ pô kiăng djru. Amăng tal kơthel phrâo rơgao, hơdôm pluh rơbâo čô khua, ling tơhan Khul tơhan 5, grup tơhan 34 hăng Anom git gai tơhan tơring čar Gia Lai iâu pơthưr mơnuih, rơdêh ngă hrŏm hăng kông an, gong gai pơphun djru mơnuih bưp tơlơi truh, ba pơđuăi hơdôm rơtuh rơbâo čô mơnuih amăng kual hŭi rơhyưt nao pơ anih rơnuk rơnua, djru brơi hơdôm pluh rơbâo wơ̆t mơnuih amăng hrơi hơjan ia dăo kơtang.

Tlam mơmŏt lơ 23/11, tơhan plơi să Dran, tơring čar Lâm Đồng ăt djru mơnuih ƀôn sang nao dŏ pơ anih hơđong, laih dơ̆ng pơdŭ pơgiăng gơnam tam đuăi mơ̆ng anih hŭi lŏn tơhlŏm.

Hlâo kơ anun, lơ̆m 3 mông či tlam, gong gai kơnuk kơna să Dran ƀuh či kơdư čư̆ Ba Lá Xanh, plơi Lạc Thiện 2 hơmâo tơhnal lŏn čơđang glông 300 met, prong mơ̆ng 20-50 cm, anih čơđang dơlam truh 1 met treng tơkai čư̆, hŭi biă mă hơmâo tơlơi truh lŏn dlưh, hơdôm hơpluh khô̆i pơtâo pơprong či tung glung trun djơ̆ hơdôm hơboh boh sang anŏ mơnuih ƀôn sang dŏ ter tơkai čư̆. Lơ̆m hmư̆ tơlơi pơhing anun, gong gai kơnuk kơna brơi mơnuih ƀôn sang đuăi dŏ pơ anih pơkŏn, dăp brơi anih dŏ jưh jăng jai, ƀing tơhan plơi, tơhan kông an djru pơdŭ pơgiăng brơi gơnam mơnuih ƀôn sang pơđuăi hĭ kiăng huăi răm ƀăm laih anun pơgang rơnuk rơnua brơi mơnuih ƀôn sang.