Hlâo kơ anun, tom brơi, lơ 22/1, Jơnum ruah khua tal XIV ping gah dêh čar hơmâo pôr pơthâo laih boh tơhnal plĕ hră ruah khua hăng posit anăn ƀing khua mua djơ̆ anăn Khul apăn bruă ping gah dêh čar tal XIV.

Tui hăng hră lăi pơthâo hăng ƀing čih tơlơi pơhing, amăng hrơi mă bruă tal 4, Jơnum ruah khua ping gah hơmâo mă bruă sa hrơi pioh pơčrong sai hăng ngă tui hơdôm boh yom phun kơ bruă ruah mơnuih apăn bruă ping gah dêh čar tal XIV. Khua git gai ping gah ơi Tô Lâm pơ ala kơ khul khua mua git gai mông jơnum. Ơi Lê Minh Hưng, ding kơna ding jum kơđi čar, ding kơna khul git gai ping gah dêh čar, Khua anom pơphun bruă mă ping gah dêh čar pơ ala kơ khul git gai mông jơnum pơđok Hră lăi pơthâo mơ̆ng Khua apăn bruă ping gah dêh čar tal XIII kơ bruă ruah mơnuih apăn bruă khua pơ ala mơnuih ƀôn sang dêh čar tal XIV.

Jơnum ta lanai hơmâo pơčrong sai hăng posit hĭ mrô mơnuih ngă ding kơna apăn bruă ping gah dêh čar tal XIV lĕ 200 čô, hơmâo 180 čô ding kơna sit nik hăng 20 čô ding kơna aka ƀu sit nik, prăp lui či pơhrua. Ƀing khua mua hơmâo kơsem min, pơčrong sai tong ten Hră lăi pơthâo ruah mơnuih tơbiă anăn ruah ngă ding kơna apăn bruă ping gah dêh čar tal XIV; mơnuih tơbiă anăn, lăi pơthâo anăn hăng kơsem min tong ten hră pơar, čih anăn ră ruai sang anŏ, drơi jăn pô tơbiă anăn či ruah ngă khua.

Khul khua git gai jơnum hơmâo hmư̆ khua khul lăi pơthâo boh tơhnal bơkơtuai mơ̆ng djop grup khua mua pơ ala nao jơnum, lăi nao kơ Hră lăi pơthâo bruă ruah khua apăn bruă ping gah dêh čar tal XIV; bruă tơbiă anăn, lăi pơthâo anăn pioh ruah, hơdôm čô rơkâo lui čih anăn pơmut pioh ruah. Khul khua git gai lăi pơthâo Jơnum ruah khua hăng yơr tơngan tŭ ư pơsit hĭ anăn pioh ruah khua apăn bruă ping gah dêh čar tal XIV; ruah Khul khua mua jŭ yap hră plĕ, git gai bruă plĕ hră; Khul jŭ yap hră plĕ pơtô brơi hơdră plĕ hră ruah khua.

Jơnum pơphun ruah khua, plĕ hră, jŭ yap giong pôr pơthâo boh tơhnal plĕ hră hăng posit hĭ anăn hơdôm ƀing djơ̆, arăng ruah mut ngă ding kơna Khul apăn bruă ping gah dêh čar tal XIV.