Bôh yôm hơdôm rơwang bruă pơphun bruă amăng ngă đang hmua, rơđah biă ñu hơdôm bruă: pơđĭ kyar bruă đang hmua mă yua bôh thâo măi mok, ngă tui kông ngăn plơi pla hmâo hluai tui tơlơi tơjŭ pla, rông hlô mơnong, akan hơdang, pơgang rơhuông adai lŏn mơnai tui mă yua bôh thâo măi mok amăng ngă đang hmua.

Phrâo anai, ƀơi plơi prong Đà Lạt, Khul hlăk ai rơnuk Hồ Chí Minh dêh čar ta gum hrom hăng Ping gah tơring čar, Jơnum min mơnuih ƀôn sang tơring čar Lâm Đồng pơphun ngă Lơphet ƀơk pri bơni Lương Định Của tal 17 hăng ƀơk pri bơni pơplông rơwang rơnuč rơwang bruă pơphun bruă hlăk ai plơi pla thun 2022. Rơgao 17 thun pơphun, Pri apah bơni Lương Định Của hmâo pơpŭ bơni 2.050 čô “mơnuih rơgơi bruă hmua”. Hăng thun anai, pri apah bơni dưi ƀơk kơ 32 čô mơnuih hlăk ai mơbruă hăng pran hrưn đĭ ngă pơdrong hăng ba glăi bôh than prong amăng đơ đam dêh čar.

Pơhiăp amăng mông ngă lơphet, ơi Trần Tuấn Anh, Ding kơna Ding jum kơđi čar, Khua Grŭp apăn bruă bơwih ƀong dêh čar ta hmâo pơdah pran jua mơ-ak kơ bruă jai hrơi jai ƀuh hmâo lu anom bơwih ƀong, Anom mă bruă hrom, blok đang hlăk ai, hơdôm hơdră pơlir hơbit gum hrom pơđĭ kyar bơwih ƀong huă ngă đang hmua, plơi pla tañ hrưn đĭ jing hơdră klă ƀơi hơdôm anih anom, kual hăng jar kơmar. Amăng hơdôm mơnuih hlăk ai čơkă mă Pri apah bơni Lương Định Của thun 2022, lu ƀing hlăk ai hmâo prăk pơhrui glăi rơbêh kơ 30 klai prăk hăng hmâo pô đa pơhrui hmâo 706 klai prăk, kơmlai hmâo hơdôm klai prăk rim thun. Biă ñu, lu gơyut hlăk ai djuai ania ƀiă ƀơi tơring čar dô̆ tơnap tap samơ̆ hăng pran gir run hmâo yak rơgao laih ngă pơdrong lăp djơ̆, jing mơnuih hlăk ai pơdrong asah. Anai lĕ hơdôm mơnuih ngă klă bruă hlăk ai bơkơtưn bơwih ƀong huă, sĭ mơdrô rơgơi, hlăk ai gum tơngan hrom pơdŏng plơi pla phrâo ƀơi plơi pla. Hăng hơdôm hơdră, bruă ngă rơđah hmâo pơsur laih ƀing hlăk ai plơi pla hur har pran jua pơplông bơwih ƀong huă ngă đang hmua hrưn đĭ ngă pơdrong. Ơi Trần Tuấn Anh lăi:

 “Ƀing ta pơphun ư-ang hơdôm mơnuih hlăk ai ngă đang hmua rơgơi, gơñu lĕ hơdôm bơnga hiam hloh amăng mrô hơdôm klăk čô mơnuih hlăk ai mơbruă glăk hrơi mlăm gum hơgôp pran hlăk ai, bôh thâo, pran gơgrong, tơlơi gir run kơ tơlơi pơđĭ kyar bruă đang hmua, pơdŏng plơi pla phrâo. Kâo đăo gơnang lĕ, hăng tơlơi ư-ang mơng rim gơyut hlăk ai dưi čơkă mă pri apah bơni hrơi anai, amra dưi lar hyu truh lu mơnuih hlăk ai, tơdăm dra ƀơi rim plơi pla, anom bruă, djru yôm phăn pơtrut hơdôm bruă bơkơtưn bruă ƀong huă sĭ mơdrô rơgơi, pơdŏng plơi pla phrâo hmâo lu yak anăp nao kơtang hloh pơ̆ anăp anai”.

Ơi Trần Tuấn Anh ăt rơkâo mơn, hơdôm gưl Ping gah, Gong gai, hơdôm bôh ding jum, grŭp, gơnong bruă kiăng đing nao hloh dong kơ ƀing tơdăm dra hăng bruă tơdăm dra, dŏng yua hăng ngă gal brơi klă hloh pioh hlăk ai đơ đam dêh čar hăng Khul hlăk ai lăi hrom, tơdăm dra plơi pla lăi ha jăn, tuh rơyuh pran jua, bôh thâo, ba jơlan hlâo gum hrom pơđĭ kyar bơwih ƀong – mơnuih mơnam, ngă tui truh kih tơlơi măi mok pơplih phrâo, pơplih phrâo lŏn ia hăng đang hmua, plơi pla.

Amăng mông ngă lơphet, 32 čô mơnuih hlăk ai mơbruă dưi ruah mơng 81 pok hră pơ-ar mơng 45 bôh tơring čar, ƀôn prong amăng đơ đam dêh čar ta dưi ƀơk Pri apah bơni Lương Định Của thun 2022. Grŭp pơphun hmâo ƀơk laih kơ 9 rơwang bruă klă hloh (hmâo sa pri mrô sa, 2 pri mrô 2, 3 pri mrô 3 hăng 3 pri pơsur pơtrut), amăng abih bang mrô 31 rơwang bruă gum hrom rơwang pơplông rơnuč Bruă pơplông rơwang bruă pơphun bruă hlăk ai plơi pla thun 2022.

Ăt bơdjơ̆ nao tơlơi pơphun bruă kơ hlăk ai plơi pla mơn, amăng rơwang hrơi tơjuh rơgao, Khul pơlir hơbit hlăk ai Việt Nam tơring čar Daklak hmâo pơphun jơlan hơdră pơhrăm pơđĭ tui bôh thâo, mă yua bôh thâo phrâo măi mok amăng bruă ngă đang hmua hăng sĭ gơnam tam pioh kơ hlăk ai djuai ania ƀiă. Gum hrom anih pơhrăm hmâo rơbêh kơ 100 čô mơnuih hlăk ai djuai ania ƀiă glăk bơwih ƀong huă, sĭ mơdrô amăng bruă đang hmua hăng mơnuih apăn bruă Khul pơlir hơbit hlăk ai ƀơi anih mơnuih ƀôn sang dô̆ amăng đơ đam tơring čar.

Ƀing nao hrăm dưi hrăm bôh thâo pơlir nua gơnam, pơlir hơbit, hơdôm bôh thâo mă yua anăn pơplir hơbit nua gơnam amăng bruă ngă rai gơnam hăng sĭ gơnam tam, bôh thâo lăi pơhư̆č hăng sĭ gơnam. Ngă tui ƀut bruă pơlir hơbit, pơjing plăng điện tử hăng sĭ gơnam lăng nao rai mơng ataih. Ayong Y Lê Pas Tơr, Khua Khul pơlir hơbit hlăk ai Việt Nam tơring čar Daklak brơi thâo, anai lĕ bruă ngă tui jơlan hơdră mơng Khul pơlir hơbit hlăk ai Việt Nam kiăng djru hlăk ai djuai ania ƀiă ƀơi tơring čar hmâo dong bôh thâo, thâo bruă, tơlơi găn rơgao, pơplih phrâo bôh thâo măi amăng ngă đang hmua, djru pơđĭ kyar bơwih ƀong mơnuih mơnam.

 “Amăng mông bruă ngă đang hmua mơng hlăk ai ƀơi tơring čar Daklak hmâo mrô bôh thâo phrâo hơdră phrâo ăt kah hăng mă yua bôh thâo phrâo măi mok amăng bruă ngă đang hmua ăt dô̆ lu mơn anô̆ akă dưi ngă. Bruă lăi pơthâo bôh thâo bơdjơ̆ nao mă yua hơdôm tơlơi pơplih phrâo kơsem min hơdră phrâo măi mok hăng amăng bruă ngă đang hmua kơ hlăk ai lĕ sa bruă mă ba jơlan hlâo. Khul hlăk ai, grŭp gum hrom hăng abih bang bruă pok phun bruă mă, biă ñu lĕ bruă gum hrom hăng hlăk ai amăng pơjing pô, pơdŏng bruă, pơphun bruă”./.