Lơ 7/5, ƀơi phường Ƀuôn Ma Thuột, tơring čar Dak Lak, Anom pơtô bruă ping gah hăng pơtô mơnuih ƀôn sang dêh čar, ngă hrŏm Ding jum kông, Ding jum Djuai ania hăng Tơlơi đăo hrŏm hăng anom bruă ping gah tơring čar Dak Lak, jơnum lăi pơthâo tong ten, pok pơhai ngă tui djop hră pơar, tơlơi pơtrun mơ̆ng Khul git gai ping gah dêh čar kơ bruă gah djuai ania, tơlơi đăo amăng črăn rơnuk phrâo.

Jơnum anai, kiăng pơđĭ tui tơlơi thâo hluh, bruă glăm ba mơ̆ng djop sang bruă ping gah, anom bruă ping gah lơ̆m git gai, wai lăng ngă tui gah bruă mă djuai ania, tơlơi đăo, lir hơbit hăng bruă mă pơđĭ kyar bơwih ƀong huă kơ mơnuih mơnam, pơgang rơnuk rơnua dêh čar, hơđong hăng bong kơjăp bruă kơđi čar. Pơhiăp đĭ ƀơi mông jơnum git gai, ơi Phạm Tất Thắng, ding kơna ping gah dêh čar, Kơ-iăng khua anom pơtô bruă ping gah hăng pơtô mơnuih ƀôn sang dêh čar lăi pơtong, bruă mă wai lăng gah djuai ania, tơlơi đăo sa bruă mă yom pơ anăp adih sui thun, djru hrŏm ngă kơjăp tui khul gum pơgôp djop djuai ania amăng mơnuih ƀôn sang. Djop gưl, sang bruă kơnuk kơna tañ ngă tum teč hloh jơlan hơdră či ngă bruă sit nik, pơđĭ tui tơlơi gơgrong ba mơ̆ng mơnuih arăng đăo kơnang, ƀing khua pô pơtô amăng djop tơlơi đăo amăng bruă jak iâu, pơtô lăi mơnuih ƀôn sang.