Jơnum anai kiăng djru hơdôm tơring čar amăng kual Dap Kơdư pơđĭ tui tơlơi thâo pok pơhai Akŏ bruă pơđĭ kyar sĭ mơdrô amăng điện tử hăng bơwih ƀong huă mrô dêh čar mơ̆ng thun 2021-2025, anăp nao pơđĭ kyar sĭ mơdrô amăng điện tử hăng bơwih ƀong huă mrô hơđong kjăp. Tơ tă anai, tơring čar Gia Lai hơmâo năng ai 224 mơta gơnam OCOP ba pơdah thâo hơmâo anăn amăng plăng điện tử. Hơdôm mơta gơnam sĭ mơdrô amăng điện tử hơmâo djru kơ lu sang bruă mơdrô pơhrui glăi lu hloh 20% pơkă hăng hlâo kơ anun.

Ƀơi mông jơnum,lu khua mua lăi pơthâo anŏ gun, kơđông, tơlơi kơƀah gơnam yua mă bruă, anŏ pơphun brơi logistics, mơnuih mă bruă thâo rơgơi hăng tơlơi juăt blơi yua mơ̆ng mơnuih ƀôn sang ngă kơ bruă sĭ mơdrô amăng plang internet jing điện tử ƀơi Gia Lai lăi pha, amăng kual Dap Kơdư nun mơ̆n aka ƀu pơđĭ kyar lăp djơ̆ anŏ gêh găl mơ̆ng ñu ôh. Mah hơmâo lu anŏ gun hăng dŏ kơƀah, samơ̆ tơring čar Gia Lai lăi hơjăn, kual Dap Kơdư hnun mơ̆n, ăt dŏ hơmâo lu tơlơi gêh găl pioh pơtrut tui bruă sĭ mơdrô amăng điện tử hăng bơwih ƀong huă mrô pơđĭ kyar tañ kơñ pơgi ni anăp.