Gum hrŏm Bơkơtuai hmâo hơdôm mơnuih juăt bruă, mơnuih kơsem min, wai lăng akô̆ bruă hăng mơnuih pơ ala 5 bôh tơring čar kual Dap Kơdư. Yap truh blan 6/2023 kual Dap Kơdư hmâo 2.187 bôh Anom mă bruă hrŏm, amăng anun rơbêh kơ 1.600 bôh Anom mă bruă hrŏm gah đang hmua, dô̆ glăi lĕ hơdôm bôh anom mă bruă hrŏm gah rơngiao kơ bruă đang hmua.

Khă hnun hai hmâo pơtŏng sit anih gơgrong, bruă mă amăng pơtrut bơwih ƀong – mơnuih mơnam kual Dap Kơdư pơđĭ kyar, samơ̆ tui tơlơi gum pơhiăp mơ̆ng khua pơ ala ƀơi mông Bơkơtuai lĕ hơdôm bôh Anom mă bruă hrŏm ƀơi kual anai ăt glăk khom bŏng glăi mơn hăng lu tơlơi lông hăng anô̆ gun, kah hăng: Tơlơi pơmin, bôh thâo prăk kak hăng anô̆ klă mơnuih mă bruă... Kiăng bơwih ƀong Anom mă bruă hrŏm kual Dap Kơdư yak rơgao tơlơi tơnap pơđĭ kyar dong, amăng mông Bơkơtuai ƀing khua pơ ala hmâo đing nao bơkơtuai, pơblang ngă rơđah tơlơi pơđĭ kyar bơwih ƀong Anom mă bruă hrŏm kual Dap Kơdư ră anai; bôh than ba truh hơdôm tơlơi tơnap, akă dưi ngă hăng pơsit jơlan gah bruă mă kiăng pơtrut kơtang bơwih ƀong Anom mă bruă hrŏm ƀơi kual Dap Kơdư pơđĭ kyar dong pơ̆ anăp anai./.