Ƀơi črăn tuh pơ alin čuk pơkra mrô III să Čư̆ Êlăng, tơring glông Ea Kar, tơring čar Dak Lak, hơmâo na nao hơdôm rơtuh čô mơnuih mă bruă git gai pơčrâo ba, ƀing mă bruă apah hăng 60 boh rơdêh čuk, rơdêh dơlit mă bruă 3 wơ̆t pơblih nao rai hrơi mlam ƀu pơdơi ôh. Djop bruă čuk pơkra kah hăng tuh pơtâo ngă tơmeh tơdrông tua, tuh ƀêtông dơlit ngă atur jơlan….

Ơi Trần Hữu Quốc Khua git gai kơčăo bruă anai brơi thâo, truh mông anai bruă čuk pơkra jơlan anai ăt dŏ lu tơlơi gun aka ƀu pơsir giong ôh, kah hăng pơblih yua lŏn glai jing lŏn dưi čuk pơkra jơlan, bruă duh glăi lŏn sang đang hmua mơnuih ƀôn sang, samơ̆ anom bruă anai ăt gir run pơtrut hmar bruă čuk pơkra jơlan, duh glăi, pơblih giong dơ̆ pă lĕ, čuk pơkra kiăo tui dơ̆ anun mơtam. Ƀơi kơčăo bruă čuk pơkra mrô II yua Ding jum Jơlan glông Pơdŭ pơgiăng pô tuh pơ alin čuk pơkra ƀơi kual să Čư̆ Drăm, tơring glông Krông Bông djop anom bruă ngă hrŏm ăt hlăk ba nao lu mơta rơdêh, mơnuih mă bruă ngă pơgiong hĭ djop črăn.