Amăng mông pơhiăp nao rai, dua čô khua pơdah tơlơi hok mơ-ak lơm pơphun mông pơhiăp telephôn gưl khua mua pơprong kiăng pơlăi nao rai bruă pơtrut tơlơi rô nao rai ngă hrŏm djop mơta Việt Nam-Hàn Quốc hăng hơdôm bruă dua bơnah đing nao. Khua mir sir Hàn Quốc pơsit tong, lăng yôm tơlơi gơgrong mơng Việt Nam amăng pok pơhai hơdôm hơdră bruă mơng Hàn Quốc amăng kual.

Dua čô khua tŭ ư kơtưn ƀiă dong, thâo hluh tơdruă hăng đăo gơnang kơđi čar hluai tui mông pơbưp, pơlăi nao rai khua mua hăng hơdôm plang pơbưp nao rai gưl Ping gah, kơnuk kơna, Khua pơ ala mơnuih ƀôn sang dêh čar hăng mơnuih ƀôn sang dua bơnah; kơtưn ngă hrŏm amăng pơgang rơnuk rơnua; pơtrut ngă hrŏm bơwih ƀong huă, sĭ mơdrô hăng tuh pơ alin jai hrơi sit nik, tŭ yua, bơkơnar, hơđong kjăp. Dua bơnah tŭ ư amra gir run đĭ tui rơnoh sĭ mơdrô dua bơnah truh 150 klai đôlar Mi amăng thun 2030.