Ƀơi mông jơnum, Jơnum min mơnuih ƀôn sang tơring glông Đức Cơ hơmâo kĭ hăng brơi “Hră čih pioh tơlơi ngă hrŏm tuh pơ alin kơ 7 kơčăo bruă mơ̆ng 7 anom bruă tuh pơ alin amăng hơdôm bruă yôm phun kah hăng man pơdong anih anom, ia jrao, ngă hmua pla glai. Đức Cơ jing tơring glông gah Yŭ Gia Lai, yôm biă mă amăng kual pơđĭ kyar 3 bơnah Việt Nam - Lao - Kur. Yap truh kơ thun 2023, tơring glông Đức Cơ hơmâo laih 13.000 ha phun kơsu, 26.000 ha boh ñông, 9.000 ha đang kơphê, giăm 1.000 ha đang sầu riêng laih anun 800 ha đang tiu. Rơngiao kơ anun, bruă rông hlô ăt glăk đĭ kyar hơđong mơn.

Hăng hơdôm tơlơi gêh gal glăk hơmâo, tơring glông Đức Cơ hơmâo jơlan đĭ kyar hăng pơhưč tuh pơ alin bruă hmua, pơđĭ kyar ngă hmua tui jơlan pơđĭ tui anŏ yôm, pơkra gơnam hơmâo nua pơmă, biă ñu pơđĭ tui boh tŭ yua hăng dưi pơhno hrŏm gơnam tam mơ̆ng hmua ƀơi anih sĭ mơdrô.