Lơ 23/12, ƀơi Đà Lạt, Jơnum min mơnuih ƀôn sang tơring čar Lâm Đồng pơphun Jơnum lăng glăi Jơlan hơdră dêh čar kơ bruă kơtưn ngă hrŏm pơtrut pơsur djru gah rơngiao kơnuk kơna mơng hơdôm boh dêh čar tač rơngiao rơwang thun 2019-2025. Amăng hrơi blan rơgao, tơring čar Lâm Đồng tŭ mă 133 jơlan hơdră, akŏ bruă anet prong mơng hơdôm khul grup gah rơngiao kơnuk kơna mơng hơdôm boh dêh čar djru brơi abih tih rơbêh 18 klăk 250 rơbâo đôlar Mi. Tui sem lăng mơng Jơnum min mơnuih ƀôn sang tơring čar Lâm Đồng, hơdôm jơlan hơdră, akŏ bruă anet prong mơng hơdôm khul grup gah rơngiao kơnuk kơna mơng hơdôm boh dêh čar pơgôp pơđĭ kyar bơwih ƀong huă-mơnuih mơnam kah hăng pơhlôm tơlơi hơdip mơnuih mơnam, plai ƀiă rin rơpa, bơwih brơi tơlơi suaih pral, pơtô pơjuăt, hrưn đĭ amăng bruă mă, tơlơi pơmĭn mơng mơnuih ƀôn sang kual pok pơhai, pơgôp pơplih tơlơi hơdip mơnuih ƀôn sang, sit biă ñu lĕ kual mơnuih djuai ania ƀiă, kual tơlơi bơwih ƀong dŏ lu tơnap tap.

Amăng mông jơnum, tơring čar Lâm Đồng hơmâo lăi pơthâo kơ tơlơi đing nao amăng pơhưč djru prăk. Tui anun, hơdôm bruă đing nao blung hlâo amăng tơring čar anun lĕ ia jrao, ngă hmua, pơtô pơjuăt, hơdôm bruă mơnuih mơnam…Tơring čar glăk pơjing hơdôm akŏ bruă jak iâu djru brơi rơwang thun 2026-2030 hrŏm hăng akŏ bruă wai lăng hăng mă yua prăk djru gah rơngiao kơnuk kơna mơng hơdôm boh dêh čar; ngă gêh gal brơi tơhnal pơkă hăng hơdră bruă kiăng pơsur hơdôm khul grup gah rơngiao kơnuk kơna nao ngă bruă, pok pơhai hơdôm akŏ bruă ƀơi tơring čar hluai tui djơ̆ tơlơi phiăn Việt Nam hăng hơdôm tơlơi pơkă amăng tơring čar.