VOV4.Jarai-Ƀrô djơ̆ hơdor glăi hrơi pơpŭ kơ Mơnuih ngă bruă sĭ mơdrô Việt Nam lơ 13/10, mơguah lơ 11/10, Sang hră kơđi čar dêh čar djă anăn Hồ Chí Minh ngă hrom Khul pơlir hơbit sĭ mơdrô hăng Tuh tia pơkra ming Việt Nam VCCI pơphun jơnum bơkơtuai boh thâo ia rơgơi hăng akŏ ñu “Pran jua hiam mơnuih ngă bruă mơdrô hăng gru grua hiam sĭ mơdrô Việt Nam amăng rơnuk phrâo”.

Pơhiăp amăng mông jơnum, Khua sang hră kơđi čar dêh čar djă anăn Hồ Chí Minh, ơi Nguyễn Xuân Thắng lăi, pran jua hiam ngă bruă sĭ mơdrô hơmâo tơlơi gơgrong phun pơpha, anăp nao bruă mă sĭ mơdrô tui jơlan hơdră thâo rơgơi hiam, yua kơ ană mơnuih. Yua kơ anun, pran jua hiam mơ̆ng mơnuih ngă bruă sĭ mơdrô, gru grua hiam sĭ mơdrô ƀu kơnong pơgôp hrom pơtrut anom bruă sĭ mơdrô ngă hrom abih bang mơnuih mơnam, pơđĭ tui tơlơi glăm ba hăng mơnuih mơnam, anih dŏ, ayuh hyiăng laih anun dŏ jing pran kơtang pioh pơtrut pơđĭ kyar hơđong kjăp mơ̆ng djop pô sang bruă sĭ mơdrô.

Nay Jek: Pơblang