Hơdôm hrơi rơgao, ƀơi anih man pơkra jơlan đuăi hmar Khánh Hòa – Buôn Ma Thuột črăn găn să Ea Knê̆č, tơring glông Krông Pač, tơring čar Dak Lak, hơdôm pluh bôh rơdêh măi mok hăng lu mơnuih mă bruă pơpha lu grŭp hrơhrŏp man pơkra jơlan. Ơi Hồ Văn Anh, pô hmâo rơbêh kơ 20 thun hăng bruă mơgăt rơdêh čuk lŏn pơkra jơlan gah Sang bruă bơwih ƀong mơnuih ƀôn sang An Nguyên (Dak Lak) anom glăk man pơkra jơlan đuăi hmar lăi pơthâo, drơi pô ƀu hơdor rơđah ôh anai lĕ tết tal hơbin khom čơkă bơyan bơnga ataih mơ̆ng sang hăng mơnuih amăng sang anô̆. Tết anai, ñu hăng ƀing gŏp ñu ăt dưi hmâo sang bruă pơphun brơi ƀong tết ƀơi anih mă bruă mơn. Ƀơi kual sang dô̆ mơnuih mă bruă, khua sang bruă hmâo pơdă laih čơangua bôh troh, hmâo bơnga dar, bơnga đào hăng hmâo djop mơta ƀañ čưng, ƀañ tét, ƀañ kĕo hăng gơnam ƀong huă kah hăng dô̆ pơ̆ sang pioh djop mơnuih čơkă bơyan bơnga... Ơi Hồ Văn Anh lăi:

 “Sang bruă pơkôl hăng anom pô tuh pơplai khom pơhlôm rơnoh pơkra jơlan, anun hlâo kơ Tết hmâo jơnum adơi ayong ƀơi anih man pơkra jơlan đuăi hmar. Khua sang bruă čih pơkra hrơi man pơkra amăng hrơi Tết hăng pran jua adơi ayong rơkâo dô̆ glăi mă bruă. Ƀing gơmơi jơnum djop mơnuih glăi hăng tŭ ư hrŏm hăng sang anô̆ pô amra rơkâo pơkra jơlan amăng hơdôm hrơi Tết mơtăm, anun lĕ mơ̆ng lơ 26/12 blan di truh lơ 6/1 blan di Tết, kơnong kơ pơdơi sa hrơi lơ sa Tết đôč”.

Sang bruă bơwih ƀong mơnuih ƀôn sang An Nguyên (Dak Lak) glăi pơkra jơlan hăng anung prăk mrô 3 mơ̆ng Km 101 + 500 truh Km 108 + 00. Ơi Lê Quốc Thắng, Kơ-iăng Khua gơgrong bruă pơkra jơlan Sang bruă bơwih ƀong mơnuih ƀôn sang An Nguyên brơi thâo, dong mơ̆ng tŭ mă anih anom pioh pơkra mơ̆ng Jơnum min mơnuih ƀôn sang tơring glông Krông Pač amăng 3 blan tal 4 thun 2023 mơtăm, Sang bruă đing nao mă yua lu rơdêh măi mok, gơnam tam hăng mơnuih mă bruă pok phun bruă man pơkra jơlan. Ră anai hmâo năng ai ñu 30 bôh rơdêh amăng anun hmâo rơdêh čuk, rơdêh ƀen, glit hăng năng ai ñu mơng 40 - 50 čô mơnuih mă bruă pơpha jing dua tal tơhrơi hăng mơmăm pơphun čuk jơlan hăng pơdŏng hơdôm tơmeh pơkra jơlan. Amăng tal Tết Giáp Thìn 2024 phrâo rơgao, kiăng pơhlôm rơnoh bruă sang bruă ăt pơphun mơn bruă mă kah hăng rim hrơi, djop bruă bơwih brơi kơ mơnuih mă bruă hmâo sang bruă ngă tui djop tum. Ơi Lê Quốc Thắng lăi:

 “Mơ̆ng lơ 26/1 blan di truh lơ 6/1 Tết, rơngiao kơ prăk yap tui kơnuk kơna mă bruă amăng hrơi pơdơi lơphet, Tết, sang bruă djru brơi dong rim čô mơnuih mă bruă sa klăk prăk sa hrơi. Anai lĕ hơdră bruă pơsur pran jua mơnuih mă bruă, djop mơnuih yua kơ sang bruă lĕ sang bruă ăt yua kơ djop mơnuih mơn”.

Rơwang bruă jơlan đuăi hmar Khánh Hòa – Buôn Ma Thuột hmâo rơwang ataih năng ai ñu 117,5 km tô tơring čar Khánh Hòa hăng Dak Lak. Abih bang rơnoh tuh pơplai rơwang bruă lĕ 21.935 klai prăk mơ̆ng ngăn drăp kơnuk kơna. Rơwang bruă dưi pơpha jing 3 anung prăk anun lĕ, anung prăk mrô sa yua kơ tơring čar Khánh Hòa ngă pô tuh pơplai; anung prăk mrô 2 yua kơ Ding jum jơlan nao rai dŭ pơgiăng pơdŏng pơkra; dô̆ glăi anung prăk mrô 3 yua kơ tơring čar Dak Lak ngă tui. Anung prăk anai dưi hmâo tơring čar Dak Lak jao kơ Grŭp wai lăng rơwang bruă tuh pơplai pơkra jơlan nao rai hăng bruă đang hmua pơđĭ kyar ƀôn lan tơring čar ngă pô tuh pơplai pok pơhai man pơkra.

Ơi Đặng Thọ Dần – Kơ-iăng Khua Anom wai lăng bruă jơlan nao rai dŭ pơgiăng Grŭp wai lăng rơwang bruă, pô ƀơi anăp gum hrŏm lăng tui bruă man pơkra anung prăk mrô 3 brơi thâo, ră anai abih bang hơdôm bôh anom man pơkra glăk tañ pok pơhai pơkra hơdôm mơta bruă kah hăng čuk lŏn, glĭt atur, pơdŏng hơdôm phun tơdrông tua găn čroh ia... Amăng tal Tết Giáp Thìn 2024 phrâo rơgao, hơdôm bôh anom man pơkra leng kơ rơkâo mă bruă amăng hơdôm hrơi pơdơi tết, Grŭp hmâo rơkâo ƀing pô anom bruă rơngiao kơ pơhlôm rơnoh bruă, anô̆ kơjăp man pơkra lĕ, khom đing nao tŏng ten truh prăk djru kơ mơnuih mă bruă gum pơkra jơlan tui tơlơi pơkă.

 “Ră anai, tơdơi kơ hmâo lŏn pioh pơkra jơlan lĕ ƀing gơmơi gơgrong man pơkra hmâo đing nao tañ pok pơhai čuk lŏn pơkra jơlan amăng anih mơnuih ƀôn sang dô̆ pioh kơ bruă pơkra jơlan tui rơwang bruă. Kah hăng anung prăk mrô 1 lĕ 100% hmâo jơlan pioh kơ bruă man pơkra. Bơ̆ anung prăk mrô 2 lĕ, ăt hmâo giong laih mơn rơbêh kơ 70%. Anung prăk mrô 3 ăt phun ñu mă yua laih hăng glăk dưi hmâo pô gơgrong man pơkra pok pơhai hrơhrŏp”.

Tui tơlơi pơkă truh thun 2030, tơhnal lăng truh thun 2050, jơlan đuăi hmar anai amra jing jơlan phun pioh pơjing sa amăng 5 glông jơlan bơwih ƀong mơ̆ng kual Dap Kơdư, hăng bruă mă dưi đing nao hlâo lĕ bơwih brơi, tuai čuă lăng hăng pơgiăng gơnam tam. Dưi pơphun pơkra mơ̆ng blan 6 thun 2023, ră anai jơlan đuăi hmar Buôn Ma Thuột – Khánh Hòa hmâo pơjing laih. Hơdôm rơwang bruă jơlan nao rai amăng kual Dap Kơdư, hơdôm rơwang bruă hmâo tơhnal pơlir kual dưi pok pơhai kơtang tit, glăk amăng ƀrư̆ tô nao rai hơdôm glông jơlan phun bơwih ƀong mơ̆ng rim tơring čar, mơ̆ng kual hăng mơ̆ng kual Tŏng Krah – Dap Kơdư, pơjing dong pran pơtrut pioh pơđĭ kyar bơwih ƀong mơnuih mơnam./.