Amăng anih dŏ mă bruă čuk pơkra jơlan mơ̆ng Tu Mrông hlâo adih, gah tơring glông Tu Mrông, tơring čar Kon Tum hơđăp, găn nao pơ plơi thôn 8, să Đak Psi, hlâo adih gah tơring glông Đak Hà, tơring čar Kon Tum hơđăp, ră anai tơring čar Quảng Ngãi, mông mă bruă dik dăk beč bal, hmar hloh. Mơ̆ng mơguah sing bring, truh adai či tlam mơmŏt hmư̆ na nao jua rơdêh čuk, rơdêh tuah, mơnuih mă bruă ngă kông ñơn pơblih nao rai tui mông, pơpha mông mă bruă, pơjing rai bruă mă kơdok kơdor ba mơtam amăng hơdôm hrơi akŏ thun.

Kơčăo bruă anai, hơmâo rơnoh tuh pơ alin 220 klai, mă yua prăk mơ̆ng gơnong dlông djru hăng prăk ngăn drăp tơring čar, jơlan glông 8,3 km. Amăng anun črăn hơmâo 800 met pơdjơ̆ hrŏm jơlan prong 40 B dưi čuk pơkra phrâo pok pơhư prong hloh, črăn dŏ glăi čuk phrâo abih bang. Laih ngă giong jơlan anai pơtruh nao rai să Tu Mrông hăng să Đak Psi, djru pơtrut tơlơi bơwih ƀong huă mơnuih mơnam, pơhlom hơđong tơlơi rơnuk rơnua dêh čar, plơi pla, laih dơ̆ng mă yua klă hloh lŏn mơnai glai klô hăng pơdong plơi pla ter jơlan prong.

Truh ră anai, rơnoh ngă bruă čuk jơlan hơmâo 45 % laih; ngă giong kuăi hăng kor đĭ atur jơlan, tuh boh pơtâo atur čơƀeng jơlan prong 40B. Sang bruă pô čuk pơkra, iâu pơtum ba nao 60 boh rơdêh čuk djop mơta hăng 80 čô mơnuih ngă kông ñơn mă bruă, pơpha ngă bruă mơ̆ng anăp čuk, pơkra sa amăng plĕ, ngă hrŏm pô klơi, pô čuk, pô kuăi, pô pơbŭ đĭ, tuh simăng, man pơkra king hăng anŏ pơgang dua bơnah jơlan.

Ơi Phan Ngọc Duy, Khua git gai bruă mă ring bruă jơlan prong 40B črăn găn nao pơ să Tu Mrông, nao pơ plơi thôn 8, să Đak Psi, tơring čar Quảng Ngãi brơi thâo, anom bruă gơñu pok pơhai mă bruă pơpha nao 10 anăp čuk pơkra jơlan, đing nao hlâo pơkra ming anih tơkuh jơlan čơlah ƀơ̆i hăng hơdôm arăt jơlan phun pơtruh hăng jơlan prong 40B, kiăng dưi nao rai hruaih hloh, ngă gêh găl kơ mơnuih ƀôn sang hơmâo jơlan rô.

“Tui hăng hră pơkôl hơmâo kĭ pơkôl mă bruă, hrơi blan ngă tui kơčăo bruă anai amăng 900 hrơi. Khă hnun, gah sang bruă tŭ mă čuk pơkra, pơkă tơhnal mă bruă, gir run ngă giong bruă tañ hloh kơ akŏ bruă jao sa thun. Lŏn mơnai anih dŏ mă bruă huăi tơnap đơi ôh, kơnong đing nao bruă pơpha ba anăp mă bruă, pok jơlan kơ mơnuih ƀôn sang rô nao rai, yua kơ jơlan anai hơmâo jơlan rô nao rai mơ̆ng hlâo laih, hlăk dŏ yua”.

Bơ ƀơi să Đak Pek, tơring čar Quảng Ngãi, gah tơring glông Đak Glei, tơring čar Kon Tum hơđăp, dua kơčăo bruă čuk pơkra jơlan nao rai phun hlăk pok pơhai anun lĕ kơčăo bruă čuk jơlan mơ̆ng plơi phun Đak Glei hơđăp nao pơ să Sôp, tơring glông Đak Glei hơđăp, ră anai să Sôp, tơring čar Quảng Ngãi laih anun kơčăo bruă pơkra tơdrông tua 16/5.

Kơčăo bruă čuk pơkra jơlan lĕ pơphun mơ̆ng plơi phun Đak Glei hơđăp, nao pơ să Sốp glông 17 km, čuk pơkra tui hnơ̆ng pơkă jơlan rô nao rai amăng plơi pla gưl A, atur jơlan prong 6,5 met (6 met mơkrah). Ring bruă anai, pok pơhai ngă tui mơ̆ng blan 12/2024 truh blan 12/2026, ră anai ngă giong 10% rơnoh prăk kĭ pơkôl, hlăk pơtum dŏ ngă bruă, kiăng ngă khăng pơkơjăp atur jơlan.

Kơčăo bruă pơkra tơdrông tua anăn lơ 16/5 hơmâo rơnoh tuh pơ alin rơbêh 86 klai prăk, hơmâo pơkra tơdrông tua hăng jơlan dua bơnah akŏ tơdrông tua, glông 648 met. Truh ră anai, bruă hơmâo ngă giong truh 75% rơnoh prăk tui hră pơkôl. Anom bruă pơkra ming hơmâo ba nao 3 boh rơdêh tuah, klơi lŏn, 2 boh rơdêh dơlit hăng  20 čô mơnuih dŏ mă bruă na nao pơblih nao rai ƀu pơdơi ôh. Hơdôm črăn phun dŏ pơkra ming ngă pơgiong tui, kah hăng dưm đing ia rô đuăi, bư̆ hĭ hnoh ia, dưm truă apui lơtrik bơngač hăng lu črăn bruă djru ba, kiăng tañ giong tuh ƀêtông atur tơdrông tua, giong anun tuh a kơsu dơnar, dưm truă apui pơčrang khom giong hlâo kơ ngă yang thun phrâo ƀong têt pơ anăp.

Yă Nguyễn Thị Thương, Khua Jơnum min mơnuih ƀôn sang să Đak Pek, tơring čar Quảng Ngãi brơi thâo:

“Hăng kơčăo bruă pơkra tơdrông tua 16/5, rơnoh mă bruă năng ai 80% laih, pơkă hăng rơnoh prăk tuh pơ alin. Sang să krăp lăng na nao, pơtrut sang bruă man pơkra tơdrông tua anun, brơi git gai, kơtưn mă bruă laih anuh čuk pơdăo anih man pơkra, duh glăi djơ̆ lŏn đang mơnuih ƀôn sang kiăng ngă gêh găl brơi bruă man pơkra amuñ hloh”.

Thun 2026, yom pơphăn biă mă, thun pơphun jơnum ruah khua ping gah đơ đam dêh čar tal XIV, ruah khua pơ ala mơnuih ƀôn sang dêh čar tal XVI hăng ƀing pơ ala mơnuih ƀôn sang djop gưl. Anai jing thun blung a ngă tui hnơ̆ng pơđĭ kyar phrâo hăng lu anŏ gêh găl hăng lông lăng pơrơkua nao rai. Bruă pok pơhai ngă tui akŏ bruă bơwih ƀong huă mơnuih mơnam thun 2026 ƀơi tơring čar Quảng Ngãi, amăng anun ngă giong bruă čuk pơkra jơlan glông nao amra ngă gêh găl brơi rơnoh pơđĭ kyar.

Hră pơtrun jơnum ruah khua ping gah tơring čar Quảng Ngãi tal sa, rơwang bruă thun 2025-2030, hơmâo pơtong rơđah, tuh pơ alin, pơtum abih bang hăng ba yua tŭ yua hloh djop anŏ pơđĭ kyar čuk pơkra jơlan glông, tơdrông tua sa hnơ̆ng; đing nao hlâo hloh kơ gơnam yua, jơlan glông kual ataih, plơi pla djuai ƀiă. Pran jua tơgŭ ngă bruă dik dăk amăng akŏ thun phrâo hơmâo ƀuh rơđah ƀơi kual čư̆ siăng ƀuh kơdok kơdor mơ̆ng akŏ thun mơtam, kiăng pơƀuh pran jua mă bruă khut khăt hloh, pơjing atur yom pioh kơ tơring čar anai hăng djop plơi pla mă bruă kơtang hloh amăng črăn rơnuk phrâo. Ơi Nguyễn Hoàng Giang, Khua Jơnum min mơnuih ƀôn sang tơring čar Quảng Ngãi brơi thâo:

“Hnơ̆ng ngă tui kơčăo bruă hăng bruă ba yua prăk tuh pơ alin kơ bruă čar thun 2026 khom ngă djơ̆ akŏ bruă hơmâo jao laih, anai lĕ bruă mă kơđi čar yom mơ̆ng rim anom bruă, sang bruă, pô tuh pơ alin. Khom pơtum pơsir hĭ tơlơi tơnap tap, pơsir hĭ abih hơdôm tơlơi dŏ kơđông, lui hĭ jăng jai dŏ mă bruă, kiăng pơsir hĭ anŏ ngă kơđông kơ jơlan glông nao rai, lŏn mơnai, ngă hră pơar tuh pơ alin; kơtưn kơ bruă duh glăi lŏn sang đang hmua pioh pơtrut hmar ƀiă hnơ̆ng mă bruă tuh pơ alin lu kơčăo bruă čuk pơkra jơlan glông nao rai phun, yom amăng tơring čar”.