Mông tơbiă ngui, anih pioh hră pơđok mơ̆ng Sang hră gưl dua Y Ngông Niê Kđăm, să Quảng Phú, tơring čar Dak Lăk hao hač mơ-ak hloh. Amăng sang glông pơhrup tui sang Êđê, jing anih djă pioh gru grua, ƀrô jing anih pioh hơdrôm hră hơmâo pơkra phrâo, hiam, hơmâo lu hơdrôm hră, hră pơhing, măi computer hơmâo internet, lu čơđai nao pơđok hră, čơđai sang hră anih 8A, lăi:“Kâo khăp biă kơ sang pơđok hră anai yua dah ñu kar hăng sang kâo pô, hơmâo lu hră či pơđok, hơmâo lu gơnam či sem lăng, hrăm tui. Amăng mông tơbiă ngui, hăng mông hơmâo wan, ƀu nao hrăm lĕ kâo rai pơ anai. Ta dưi sem lăng lu tơlơi klă biă kơ bruă hrăm hră ăt kah hăng pơdơi pơdah kiăng djhôl ƀiă amăng akŏ dlô, amăng pran jua”.

Anih pioh hră pơđok pơlir hơbit sang gru grua hơmâo pơdong mơ̆ng thun 2020, yua Khul anom bơwih ƀong Kơnuk kơna brơi prăk man pơdong. Hrŏm hăng anun, anih anom gơnam yua hơmâo 4 dơdruai sang hră hăng 30 anih hrăm, sa anih pioh jơnum, bơrơguăt drơi jăn, 1 anih pioh kơ khua sang hră, lan ngui, anih pơtŏp hrăm...hơmâo pơhlôm tơlơi pơtô hrăm klă hloh kơ rơbêh 1.100 čô čơđai. Ơi Nguyễn Long Điện, Khua sang hră brơi thâo, amăng hơdôm thun rơgao, Sang hră gưl 2 Y Ngông Niê Kđăm hơmâo mă lu prăk djru man pơkra anih anom, blơi gơnam yua. Hăng 70% čô čơđai djuai ania Êđê, rim tơlơi djru kơ sang hră ƀu kơnong pơđĭ tui anŏ klă bruă pơtô hrăm đôč ôh ăt plai ƀiă pleh ploh mơ̆ng kual bơwih ƀong hơmâo hăng tơnap tap:“Sang bruă prăk Agribank hơmâo prăk djru lu hloh pơhmu hăng hơdôm sang bruă prăk pơkŏn hơmâo djru kơ sang hră. Prăk djru anai hơmâo man pơdong 2 ring bruă yôm biă mă kơ sang hră, bơwih brơi bruă pơtô hăng hrăm”.

Ƀu kơnong gum hrŏm gah bruă pơtô hrăm, hơdôm anom bơwih ƀong ăt gum plơi pla lŏm lui sang dŏ tơ̆i, djru ană plơi pla kual tơnap hơmâo sang dŏ pơđao, hơđong kjăp. Yă H’Bliăk Niê, ƀuôn Ea Dhô, să Čư̆ Pơng, ol kơdol lơ̆m đĭ dŏ sang phrâo, prong giăm 100m2. Mơ̆ng đưm hơdip amăng sang dŏ tơ̆i, yik yuk, ñu ƀu pơmin ôh hơmâo sang dŏ phrâo tui hăng anai:“Kâo mơ-ak biă mă lơ̆m hơmâo sang dŏ phrâo, mơ-ak kơtang kơtit, anun kâo kih rơmet, sut uă na nao kiăng sang anŏ agaih agong. Bơ hơne hơmâo anih dŏ baih, măi pưh angin hơmâo mơn, tivi hơmâo mơn, klao hok biă yơh”.

Yă H’Bliăk jing sa amăng 66 boh sang pơ să Čư̆ Pơng hơmâo djru man pơdong sang amăng jơlan hơdră lŏm lui sang dŏ tơ̆i mơ̆ng Kơnuk kơna. Ơi Y Blưn Mlô, Kơ-iăng khua hơđăp jơnum min mơnuih ƀôn sang să Čư̆ Pơng hơđăp, Khua ping gah ƀuôn Ea Dhô brơi thâo, hrŏm hăng tơlơi djru mơ̆ng Kơnuk kơna, hơdôm anom bơwih ƀong mơdrô ăt gum tơngan gum pran, djru ba plơi pla tañ ngă giong tơlơi kiăng ngă, jing anih ană plơi kơnang či hơđong tơlơi hơdip mơda:“Lơ̆m hơmâo sang bruă prăk ngă hmua djru man pơdong sang dŏ lĕ neh met wa huăi bơngơ̆t dong tah. Ră anai gơñu pơƀut jik bruă ngă hmua, neh met wa ha pran jua ngă bruă, thâo gum pơgôp biă”.

Ngă tui jơlan hơdră hrŏ trun ƀun rin hăng djru hơđong tơlơi hơdip mơnuih ƀôn sang, amăng 5 thun rơgao, tơring čar Dak Lăk hơmâo djru man pơdong hăng pơkra ming sang dŏ kơ hơdôm rơbâo boh sang anŏ rin hăng rin ƀơ ƀiă; djru prăk hrăm hră, braih, prăk ƀong huă, prăk apah sang dŏ kơ rơbêh 72.000 wơ̆t čơđai sang hră sang anŏ tơnap. Tơring čar ăt brơi giăm 3,3 klăk wơ̆t hră pơhlôm nua ia jrao hăng pơsir brơi rơbêh 148.000 wơ̆t boh sang anŏ rin čan prăk, hăng rơbêh 5.900 klai prăk.

Rơngiao kơ prăk mơ̆ng kơnuk kơna, hơdôm khul grup, anom mơdrô hăng mơnuih gum pơgôp hơdôm pluh klai prăk kơ bruă djru ngă hơđong tơlơi hơdip mơnuih ƀôn sang, mơ̆ng djru sang dŏ, prăk hrăm hră, lăng ba mơnuih dŏ hơjăn păn, rơnap tap, truh kơ bruă man pơkra tơdrông, sang hră pơ plơi pla tơnap tap. Hơdôm bruă anai djru bang hyu pran jua thâo khăp pap, djru nao rai tơdruă, djru ba mơnuih tơnap tap, ƀu bưng, pơtrut pran jua ƀing gơñu gir hrưn đĭ. Ơi Lê Văn Thịnh, Khua sang bruă prăk Agribank ƀơi Dak Lăk brơi thâo:“Amăng hơdôm thun rơgao, sang bruă prăk ăt pơphun ngă lu jơlan hơdră djru hơđong tơlơi hơdip mơnuih ƀôn sang hăng lu khul mơnuih phara, mơ̆ng djru ba ƀing čơđai sang hră, sang hră amăng plơi, hơdôm anom bruă pơtô hrăm; djru lŏm lui sang dŏ tơ̆i tui tơlơi pơtrun mơ̆ng Kơnuk kơna. Pơ anăp anai, anom bruă hơmâo laih bruă pok pơhai djru ba hơdôm boh sang hră pơdong amăng plơi pla mơ̆ răm rai, sô kơnô, laih anun ruh hĭ 50 boh tơ̆i amăng tơring čar”.

Ƀu kơnong djru kah pơpha gơnam, hơdôm bruă gum djru, gum ngă, djru ba tơlơi hơdip mơda mơnuih ƀôn sang mơ̆ng hơdôm khul grup, anom bruă bang hyu tơlơi gơgrong bruă yua kơ mơnuih tơpuôl, pơdah pran jua thâo khăp pap, gru grua hơdip hiam mơ̆ng djuai ania ta, kiăng abih bang gum đĭ kyar, ƀu wơr pô hlơi gah tlôn ôh.