Mlam tom brơi hăng mơguah sing bring lơ 29/9, kơthel mrô 10 anăn Bualoi jua kơtang angin pưh aka ƀu thâo pia ôh hăng hơjan hlim prong, anăp rai pơ kual Tong krah dêh čar ta, ngă răm ƀăm kơtang kông ngăn hăng mơnuih mơnam. Mơ̆ng mơguah sing bring aka rơđah ôh, ƀơi tơring čar Quảng Trị hơmâo laih 12 čô mơnuih rơngiă. Lơ̆m pưh rai pơ Nghệ An-Hà Tĩnh, kơthel hrŏ ƀiă laih anŏ pưh kơtang, samơ̆ hơjan hlim prong; ngă kơ 13 čô mơnuih djai hăng rơngiă, ĕp aka ƀuh, 2 čô mơnuih rơka.

Hlâo kơ anun, tlam lơ 28/9, ƀơi Thanh Hóa, Kơ-iăng khua dêh čar ơi Trần Hồng Hà git gai jơnum mơ̆ng ataih, lăng nao rai amăng tivi hăng djop tơring čar mơ̆ng Thanh Hóa truh pơ ƀôn prong Đà Nẵng, brơi pok pơhai hơdră pơhlôm pơgang kơthel tal 10.

Kơ-iăng khua dêh čar pơtrun hiăp, djop tơring čar, ƀôn prong pơtum ƀing tơhan mơ̆ng kơnuk kơna, nao djru mă bruă pơgang kơ mơnuih ƀôn sang, biă mă ñu đing nao anăp kơthel pưh hăng anŏ răm ƀăm kơthel či ngă. Djop plơi pla, să kual čư̆ siăng kiăng prăp lui pơđuăi mơnuih ƀôn sang mơ̆ng anih ia tơluh, lŏn tơhlŏm dlưh kriăng, prăp lui rơdêh, gơnam yua mă bruă khom ngă tui 4 mơta bruă ƀơi sa anih, kiăng hmao bong glăi hăng tơlơi truh, anŏ răm ƀăm kơthel ngă kơ mơnuih hăng kông ngăn.