Rơnuč thun anai amra pơphun man pơkra jơlan rơdêh đuăi hmar Kơdư - Dơnung ară găn nao tơring čar Phú Yên. Anai lĕ Tơlơi pơhing hơmâo lăi pơthâo amăng mông mă bruă tlam lơ 3/11, kơplah wah Kơ-iăng Khua ding jum wai lăng jơlan glông Nguyễn Duy Lâm hăng Jơnum min mơnuih ƀon sang tơring čar Phú Yên kơ bruă pơtrut pok pơhai phư lŏn kiăng kơ man pơkra jơlan rơdêh đuăi hmar Kơdư - Dơnug rơwang thun 2021-2025.

Ring bruă jơlan rơdêh đuăi hmar Kơdư - Dơnung ară găn nao tơring čar Phú Yên glông rơbêh 90 km, hăng rơnoh prăk tuh pơ alin 26 rơbâo klai prăk. Ră anai bruă jĕ yap glăi hơdôm kual lŏn mơnai amra pok jơlan giăm 83% laih. Kiăng pơhlôm djơ̆ hrơi mông pơkă, Ding jum wai lăng jơlan glông rơkâo tơring čar Phú Yên pok pơhai ha amăng plĕ hăng bruă ngă hră pơ-ar kiăng prap man pơkra hlâo kơ lơ 31/12. Ding jum wai lăng jơlan glông pơhlôm djop prăk duh lŏn kiăng kơ pok ngă jơlan, gir run djru brơi ƀon lan pơsir hĭ tơnap tap, gun găn lơ̆m pơphun man pơkra.