Ơi Nguyễn Hoàng Giang, Khua Jơnum min mơnuih ƀôn sang tơring čar Quảng Ngãi rơkâo, mơ̆ng hơdôm hrơi akŏ thun, blan blung a thun phrâo, djop gơnong bruă, djop să, plơi pla khom tơgŭ ngă bruă sit nik, khut khăt ba mơtam, anăm lui kaih ôh, hŭi tơ̆i đưn hĭ bruă pơsir yua tơdơi kơ hrơi pơdơi pơdă ngă yang thun phrâo ƀong têt djuai ania.

Khua tơring čar Quảng Ngãi pơtrun hiăp brơi jŭ yap glăi abih bang hơdôm bruă dŏ glăi aka ƀu pơsir giong amăng thun 2025, khom pơtum pơsir hĭ giong; laih dơ̆ng ngă pơrơđah glăi djop tơlơi pơkă amăng Hră pơtrun mơ̆ng Ping gah, dăp hơdră, mă yua, pơpha ngăn rơnoh, pioh pơkra ming rai gơnam tam sĭ mơdrô hăng pran jua thâo pơblih pơčeh phrâo, ia rơgơi, git gai mă bruă khut khăt kiăng hơmâo boh tŭ yua. Djop bruă mă pơphun amăng akŏ thun phrâo boh nik ñu pơkra ming pơjing rai gơnam tam, ngă hmua pla boh troh; bruă iâu pơmut tơhan akŏ thun hăng djop bruă mă phun pơkŏn khom dưi pok pơhai sa amăng plĕ djơ̆ tui akŏ bruă, jơlan hơdră hơmâo dăp laih hlâo.