Ƀơi anih man pơdong Sang hră kơnuk kơna čem rông pơlir gưl sa hăng gưl dua Sa Loong, să Sa Loong, hơdôm rơtuh čô kông ñơn kah jing lu grup, pơphun ngă ha amăng plĕ lu bruă man pơdong. Ƀơi hơdôm boh sang hră, kông ñơn glăk pŏng pơpung; ƀơi yŭ arăng glăk pik ia kulơr ječ ameč đah mơ̆ng pơgiong hĭ hơdôm bơnah pơnăng sang dŏ glăi. Amăng lăm anih hrăm, bah amăng, apui kơđen, adring sang, gai rơñan hăng gơnam yua măi mok glăk hơmâo dưm truă.

Anom bruă man pơdong glăk man 5 glông sang hră hrăm, 1 glông sang ƀing khua, 1 glông ming pơkra glăi hiam hrŏm hăng djŏp bruă kiăng yua pơkŏn dong. Tui hăng bruă kiăng ngă năng blung, 5 ruăi anih hrăm hơmâo jao hlâo kơ kơnôl 30/7; sang ƀing khua hơmâo man giong hlâo kơ kơnôl 10/8; anih pioh bơkjăp drơi jăn hăng hơdôm ring bruă dŏ glăi him lăng man giong mơ̆ng kơnôl 15 truh kơnôl 20/8.

Hơjan sui đơi jing bơbeč mơn kơ bruă man pơdong. Kiăng dưi man pơdong, pô gơgrong man pơkra dăng ƀaih pơging hĭ lu anih, laih dong iâu thim kông ñơn dong nao mă bruă. Ră anai pơ anih man sang hră hơmâo na nao năng ai 220 čô mơnuh, mă bruă 11 mông rim hrơi. Ơi Nguyễn Văn Nhất, Kơ-iăng khua anom bruă 29.7, gah Phun kông ti 319, Ding jum ling tơhan, pơsit, anom bruă pơsit anai jing bruă kơđi čar yom anun yơh iâu lu mơnuih mă bruă, gơnam yua, măi mok pơhlom kiăng tañ: “10 hrơi rơgao, hơjan kơtang biă. Anun jing gơmơi dăng ƀaih pơging hĭ pơnăng, anih glăk pik simăng, ia kulơr gah rơngiao. Hăng anih pơkra atur, pơkra lan sang, anom bruă pơdong dua anih dăng ƀaih, rim sang dăng ƀaih 60m, đah mơ̆ng dưi ngă bruă amăng ia hơjan. Him lăng truh kơnôl 15/8 dưi man giong abih anih hrăm hăng anih đih pơdơi”.

Ƀơi Sang hră kơnuk kơna čem rông pơlir hrŏm gưl sa hăng gưl dua Dục Nông, anom bruă man pơdong iâu mơ̆ng 250 truh kơ 270 čô kông ñơn, man pơkra 3 ca rim hrơi. tui hăng bruă jao năng blung, hlâo kơnôl 31/7 amra jao glăi 7 khul ring bruă hơmâo 3 glông anih hrăm gưl dua, 3 glông anih hrăm gưl sa hăng sang ƀing khua; sang apui, anih ƀong huă, sang dŏ amra hơmâo man giong hlâo kơ kơnôl 15/8.

Thượng tá Vũ Thanh Khương, Khua ping gah, Khua khul wai lăng kông ti pơčruh ngăn 319 Miền Trung (Gah Phun kông ti 319, Ding jum Ling tơhan) hrơi thâo, bruă man ƀrik pik si măng giong ƀhiao laih, dŏ glăi pik ia kulơr, pơkra bah amăng, măi mok, adring, lan sang hră, pơsơi pơsă, boh pơtâo tep gai rơñan hăng hơdôm bruă kĭ thuâ̆t dong. Thượng tá Vũ Thanh Khương ƀuăn khŏm ngă tañ giong hăng kjăp: “Gir jao glăi abih ring bruă kơ pô tuh pơ alin, dưi mă yua hlâo kơ thun hrăm phrâo. Ră anai, ƀơi anih man pơdong, pô gơgrong jak iâu mơ̆ng 250 truh kơ 270 čô kông ñơn, mă bruă 3 ca, ngă him mông dong. Ƀing ngă bruă mlăm lĕ hơmâo mơ̆ng 50 truh kơ 80 čô, kiăng gir ngă giong djơ̆ hăng hrơi pơkă”.

Tui hăng Anom wai lăng kơčăo bruă tuh pơ alin man pơdong Yŭ Quảng Ngãi, 4 boh sang hră ƀơi guai kah hăng Rờ Kơi, Sa Loong, Dục Nông hăng Mô Rai leng kơ hơmâo krăp lăng rim hrơi. Khul wai lăng pơkiăo nao mơnuih apăn bruă dŏ krăo lăng pơ rim anih man pơdong đah mơ̆ng tañ pơsir brơi anŏ tơnap, biă ñu amăng hrơi hơjan hlim na nao tui hăng anai.

Truh ră anai, sang hră Rờ Kơi hơmâo pơkra laih năng ai 90% mơta bruă, Dục Nông 87%, Sa Loong hơmâo 82%, bơ Mô Rai năng ai 68%, abih bang ƀiă či giong laih. Ơi Võ Đại Tân, Khua khul wai lăng kơčăo bruă Yŭ Quảng Ngãi brơi thâo, tơlơi kiăng lĕ ba 4 boh sang hră anai dưi mă yua hlâo kơ thun hrăm phrâo 2026-2027, kiăng dưi ngă tui djơ̆ hăng Tơlơi pơtrun mrô 71 mơ̆ng Ding jum kơđi čar kơ đĭ kyar bruă pơtô hăng pơjuăt, ƀơ ƀrư̆ plai ƀiă anŏ phara kual tơnap hăng kual pơkŏn: “Anai jing sang hră ƀu kơnong gir man pơgiong tañ đôč ôh, ăt khŏm pơhlom djŏp bruă pơtô hăng hrăm mơ̆ng ƀing čơđai dong. Yua hnun, tơlơi ngă tơnap biă ñu lĕ hrơi mông pơkă, biă ñu amăng bơyan hơjan tui hăng anai. Khul wai lăng ăt glăk gir truh kơnôl 31/7 man pơgiong abih bang, klup pơbung tôl. Tơdơi kơ anun man pơdong tañ kiăng sang hră dưi ngă giong hlâo kơ kơnôl 15/8. Abih bang sang hră khŏm hơmâo prăp lui djŏp mơta, pơhlom klă brơi thun hrăm phrâo tui tơlơi pơčrâo trun mơ̆ng Gơnong dlông”./.