Pơplông jua pơhiăp đơđam dêh čar tal XVII hơmâo 343 mơta tơlơi pơplông pôr jua pơhiăp ƀơi djop mơta jơlan hơdră pơtui hmao klôn, tơlơi pơhing, jơlan hơdră pơčrong sa hnơ̆ng, jua pơhiăp djuai ƀiă; biă mă ñu, tal blung a tơlơi pơhing pôr Podcast dưi ba pơplông sit nik. Lu mơta tơlơi pơhing, hơdră čih pơkra, dăp jơlan hơdră, pô pôr jua pơhiăp rơgơi, đok pôr mơak hloh, khul ngă bruă pơtui jua pơhiăp hmao klôn, host Podcast hăng pô gư̆ măi rơgơi hloh.

Tal pơplông jua pơhiăp đơ đam dêh čar ƀu kơnong anih pơtum djop mơta tơlơi čih, pôr pơhing hăng jua pơhiăp đôč ôh, dŏ jing hrơi mông yom pơphăn kiăng pơtrut bruă pôr jua pơhiăp Việt Nam, pơđĭ kyar kơtang hloh amăng rơnuk ba yua ia rơgơi mrô, kơtưn pơtruh nao rai plah wah anom bruă čih tơlơi pơhing  hăng ƀing thâo pơčeh phrâo čih tơlơi pơhing, dăp jơlan hơdră boh yom phun phrâo hloh, anăp nao tơlơi pơhing gơnam pơjing rai pơtui jua pơhiăp djơ̆ hăng rơnuk phrâo, dưi bang hyu bơngač kơtang jua pơhiăp mơak.