Ƀuh ƀô̆ mơta ƀơi anih mă yua ring bruă brơi rơdêh dưi nao rai jơlan đuăi hmar Khánh Hòa-Ƀuôn Ma Thuôt lơ 19/12 phrâo anai, lu mơnuih ƀôn sang amăng tơring čar hơ̆k mơak biă mă yua jơlan pơprong dưi hluh laih, rơdêh nao rai, čang rơmang ƀiă mông hloh nao rai kơñ pơgi anai, ngă gêh găl kơ bruă pơdŭ pơgiăn sĭ mơdrô pơkra ming, tuai čuă ngui hăng pơđĭ rơnoh prăk pơhrui glăi.

Ơi Nguyễn Văn Hạ, dŏ ƀơi să Ea Knuêč, hơmâo 4 ar hmua đang djơ̆ anih arăng mă glăi, čuk jơlan, ol kơdol pran juă lăi:

“Tơlơi anai lĕ tơlơi kiăng mơ̆ng mơnuih ƀôn sang mơ̆n, ƀuh tui anun hơ̆k mơak biă mă, ră anai hơmâo jơlan nao rai hiam, prong rơhaih, rơdêh đuăi hmar, bơwih brơi rô nao rai, pơdŭ pơgiăng hruaih gơnam đang hmua amăng bơyan hơpuă yuă pĕ boh, arăng nao blơi tơl đang hmua, sit mơ̆n rơnoh amra đĭ tui, dua dơ̆ng lĕ rơnoh hiam dưi pơhlom brơi klă”.

Ƀu kơnong pok brơi jơlan đôč ôh, jơlan đuăi hmar sa tơlơi  pơƀuh anŏ pơđĭ kyar phrâo amăng anih phun. Yă Ngô Thị Minh Trinh, Khua git gai ping gah să Ea Knuêx-să hơmâo jơlan rơdêh đuăi hmar găn nao ƀơ 6 anih tơjuh jơlan člah, laih dơ̆ng anih pla boh durian lu mơ̆n amăng tơring čar 5.100 hektar, ñu lăi:

“Kâo dŏ pơmin lĕ jơlan tơkuh anih jơlan čơlah anun dưi pơtruh nao rai kơ bruă sĭ mơdrô hăng lir hơbit tơlơi bơwih ƀong huă mơnuih mơnam, gru grua hiam dơ̆ng. Hlâo adih tơring glông Krông Pač gơmơi hơmâo pơkă hnơ̆ng man pơdong ƀut ngă anih pơkra ming gơnam sĭ mơdrô Tân Tiấn, hrŏm hăng anun kual logistic kiăng pơtruh brơi wai lăng tong ten hăng ba yua anŏ gêh găl mơ̆ng rim plơi pla kiăng lir hơbit jing sa ruăi, sa dơnuai amăng kual djru pơtrut tơlơi pơđĭ kyar bơwih ƀong huă mơnuih mơnam amăng să”.

Kơčăo bruă črăn 3 jơlan rơdêh đuăi hmar Khánh Hòa-Buôn Ma Thuôt glông ataih 48 km, găn nao ƀơi  7 boh să, hơmâo anŏ gơgrong yom biă mă pơtruh nao rai amăng kual Dap Kơdư hăng anih ter hang ia rơsĭ Dơnong Tong krah. Hrŏm hăng anun, kơčăo bruă pơkra jơlan Hồ Chí Minh bĕ gah ngŏ Ƀuôn Ma Thuôt glông ataih 40 km hlăk ngă pơhrŏ ƀiă rơnoh rơdêh rô nao rai kơniă jơlan amăng kual, mut nao pơ plơi prong, kiăng pơđĭ tui boh tŭ yua rô nao rai djop jơlan glông amăng kual.

Gah ngŏ tơring čar Dak Lak, tơdơi kơ hơpluh thun tơguan, Kơčăo bruă tuai hyu ngui pơdơi pơdă hiam Cù Lao Mái Nhà, sit nik man pơdong glăi rơnuč thun 2025. Hăng rơnoh ba yua lŏn mơnai hăng jơlah ia rơsĭ truh 137 hektar, abih tih rơnoh prăk tuh pơ alin 5000 klai prăk, kơčăo bruă anai, hơmâo tơlơi čang rơmang prong biă mă kơ anom bruă pơkra ming-bơwih bơwăng, laih dơ̆ng pơsir hĭ tơlơi bơngơ̆t ngă huač soh sel lŏn mơnai anih gêh găl kơ bruă čơkă tuai hyu ngui. Ơi Võ Văn Ngầu, mơnuih ƀôn sang să Ô Loan, brơi thâo:

“Mơak yơh kơčăo bruă dưi pơphun mă bruă glăi, yua kơ kơčăo bruă anai hơmâo ngă mơ̆ng sui laih, mơnuih ƀôn sang dŏ tơguan biă mă. Hrơi anai, mơak biă mă yơh hơmâo pok pơhai tơgŭ mă bruă, man pơdong plơi pla gơmơi kơñ pơgi amra jing anih bang bơngač hiam tui yơh”.

Ƀuh rơđah, kiăng dưi djơ̆ tơhnal pơkă đĭ 10% sa thun, tui hăng Hră pơtrun mơ̆ng tơring čar pơsit, Dak Lak kiăng hơdôm kơčăo bruă pơprong, hơmâo tơlơi bang bơngač kơtang. Ră anai, amăng kual lŏn ter hang ia rơsĭ hơmâo 43 kơčăo bruă kơnuk kơna ngă hră tư̆ ư brơi tuh pơ alin pơprong soh, truh 90.000 klai prăk. Tơlơi phun aliăng kiăng lăi, tui hăng boh yom phun amăng hră pơtrun, abih bang djop gơnong bruă, plơim pla khom ngă hrŏm sang bruă mơdrô, pơsir hĭ tơlơi gun kơƀah dŏ hơmâo. Anai yơh tơlơi mơ̆ lu sang bruă mơdrô ba nao prăk tuh pơ alin mă bruă hlăk dŏ tơguan. Ơi Đào Mỹ, Kơ-iăng Jơnum min mơnuih ƀôn sang tơring čar Dak Lak brơi thâo:

“Ƀing gơmơi hơmâo laih tơlơi čih lăi pơthâo kơ jơlan hơdră pơđĭ rơnoh pơhrui glăi hăng hơmâo tơlơi git gai rim črăn bruă, amăng anun gơmơi sem lăng rim thun kiăng hrŏm hơbit yak nao laih anun đĭ nao pơ anăp adih”.

Tui hăng akŏ bruă, kual gah ngŏ tơring čar Dak Lak amra pơphun lu kơčăo bruă pơprong, amăng anun 3 kơčăo bruă phun ƀơi anih bơwih ƀong huă Dơnung Phú Yên kah hăng: Tơdrun kompan Bãi Gốc, jơlan rô amăng kual man pơdong ƀut tuh tia pơkra ming gơnam sĭ mơdcrô Hòa Tâm hăng sang măi ba yua boh thâo ia rơgơi phrâo Phú Yên hăng rơnoh prăk tuh pơ alin 5 klai USD amăng đơ đam lon 750 hektar. Hơdôm ring bruă anai čang rơmang lu biă mă pơsit ba yua lŏn ter hang ia rơsĭ, pơjing rai pran kơtang amăng kual tuh tia pơkra pơjing-man pơdong kiăng djă pioh tơlơi gơgrong prong pơđĭ rơnoh pơhrui glăi amăng thun 2026 hăng hơdôm thun tŏ tui pơ anăp adih.