Rơbêh 100 čơgăn pơdă gơnam sĭ mơdrô mơ̆ng 39 boh sang bruă, anom sĭ mơdrô ƀơi tơring čar Sơn La hăng hơdôm tơring čar Hưng Yên, Ninh Bình, Yên Bái, Hà Nội, Dak Lak, Gia Lai ba pơdă....hơmâo lu mơta djuai kơphê, boh troh đang hmua, gơnam hơmâo phara mơ̆ng lu tơring, kual ba pơdah thâo amăng mông jơnum ngui bruă Kơphê Sơn La-mut phung hăng pơđĭ kyar.

Amăng anih bă hră ia iom pơhrôp hiam jơnum mơak, mơnuih ƀôn sang pla kơphê hăng ƀing sĭ mơdrô ia kơphê mơñum, nao čuă ngui, hyu ĕp lăng, mơñum ia kơphê arăng ba pơplông kah hăng: dăp kơƀang grê dŏ mơñum kơphê hiam rŏ, pơhrôp kơčok, gơnam yua djă mơñum ia kơphê, ĕp lăng bruă pơkra ming tơpung kơphê kơ-uă tơpung hăng tơngan đôč, kač rup hăng djah kơphê....Mơnuih ƀôn sang, ƀing tuai amra hyu mơñum kơphê ƀu apah prăk hăng mut ĕp hmư̆ tơlơi ră ruai kơ bruă pla kơphê ƀơi kual čư̆ siăng Sơn La, kual Kơdư yŭ. Jơnum ngui bruă kơphê Sơn La lĕ hơmâo lu bruă mă pơhưč ƀing tuai jĕ ataih nao ĕp lăng, ƀrô jơnum hơdor glăi giăm 80 thun kơphê ƀuh ƀô̆ mơta ƀơi Sơn La, dưi hơmâo anăn păn hmư̆ hing truh pơ tač rơngiao, lu dêh čar hor mơñum ia kơphê mơ̆ng anai ba hyu sĭ mơdrô.