Mơ̆ng lơ 1/12/2025 truh lơ 10/1/2026, djop puih kơđông gah ding jum ling tơhan, puih kơđông tơhan amăng kual hăng sang bruă khua tơhan tơring čar hơmâo iâu pơtum rơbêh 204.600 wơ̆t čô khua mua, ling tơhan hrŏm hăng 6000 wơ̆t ba yua rơdêh djru mă bruă nao pơ kual hơmâo tơlơi truh kơtang gah ngŏ tơring čar Dak Lak, pơphun brơi 331 grup man pơdong hăng 140 grup hyu ming pơkra pưk sang laih anun dŏ hrŏm hăng ană plơi pla, ƀơi djop sang anŏ hơmâo tơlơi truh.

Boh tơhnal amăng bruă mă anai hơmâo man pơdong hăng ming pơkra giong 331 boh sang dlưh abih, dưi rŭ glăi, pơkra hrêp glăi 90 boh sang răm kơtang; laih dơ̆ng djru ming pơkra glăi 63.220 met jơlan nao rai ƀơi bơnư̆ akŏ tli, king hmua, rô nao rai mơ̆ng plơi nao pơ hmua kiăng hmao pơsir brơi bơyan ngă hmua puih phang kơ mơnuih ƀôn sang. Jơnum anai, lăng yom hăng bơni pran jua mă bruă, prăp lui hlâo, gơgrong ba mơ̆ng ling tơhan ngă hrŏm gong gai plơi pla djru kơ mơnuih ƀôn sang pơgiong lu ring bruă tŭ yua klă.