Tui hăng Tơlơi lăi pơthâo, mrô mơnuih ƀôn sang hơmâo anăn plĕ hră amăng đơ đam dêh čar ta hrơi tom brơi lĕ: 76 klăk 516 rơbâo 637 čô mơnuih; amăng mrô anun, mơnuih nao plĕ hră lĕ 76 klăk 043 rơbâo 527 čô mơnuih (jing 99,38%). Tơring čar Lào Cai jing tơring čar ngă giong bruă plĕ hră tañ hloh, kiăo tui dong lĕ ƀon prong Huế lĕ 2/34 boh tơring čar ƀôn prong hơmâo 100% mơnuih nao plĕ hră. Biă ñu, tơring čar Lào Cai hơmâo 173 čô mơnuih plĕ hră lĕ ƀing tha mơ̆ng 100 thun truh kơ tha hloh.

Bruă plĕ hră ruah khua, hơdôm anom bruă pôr pơhing amăng dêh čar ta hăng jar kmar leng kơ krăp lăng na nao, lăi pơthâo glăi bruă ruah khua ƀơi hơdôm boh tơring čar, ƀon prong, hơdôm anih plĕ hră. Lăng yom bruă lăi pơthâo pôr pơhing tơlơi dưi nao plĕ hră mơ̆ng ƀing khua mơ̆ng Ping gah, Kơnuk kơna, tơhan blah ngă, ƀing tha rơma, ƀing hlăk ai čơđai ƀiă tal blung ba nao plĕ hră, mơnuih ƀôn sang djuai ania ƀiă, ƀing khua đăo, mơnuih ƀôn sang pơ guai dêh čar, bul pơtâo, plao ia rơsĭ, cư̆ siăng kriang pơtâo, hơdôm plơi pla tơnap tap...Mơ̆ng anun brơi ƀuh bruă plĕ hră ruah khua hơmâo pơphun ruah khua dưi ngă pô, djơ̆ akŏ tlôn, tui tơlơi phiăn; tơlơi pơmin gơgrong bruă hăng tơlơi hok kơdok amăng Hrơi mơak prong mơ̆ng abih bang mơnuih ƀôn sang.