Mơmot lơ 18/3, Khul hlăk ai cộng sản rơnuk Hồ Chí Minh dêh čar ta pơphun ngă Lơphet hơdor glăi 94 thun Hrơi pơdŏng Khul hlăk ai cộng sản rơnuk Hồ Chí Minh hăng ƀơk pri bơni Lý Tự Trọng thun 2025. Pơhiăp amăng mông ngă lơphet, Ơi Nguyễn Trọng Nghĩa Khua Grŭp pơtô bruă Ping gah hăng Pơtô ba mơnuih ƀôn sang dêh čar ta rơkâo rơnuk hlăk ai khom jing khul ba jơlan hlâo amăng kơsem min, mă yua, pơđĭ kyar bôh thâo phrâo, hơdră mă yua măi mok.

Ơi Nguyễn Trọng Nghĩa rơkâo Khul hlăk ai cộng sản rơnuk Hồ Chí Minh dêh čar ta khom lăng yôm bruă pơtô pơhrăm tơlơi pơmin ngă hơkrŭ, tơlơi hơdip mơda kơ rơnuk hlăk ai, pơtô pơhrăm hăng pơlar pran kơtang, pran gơgrong pô, phing kơ pran jua, ư-ang djuai ania hăng čang rơmang tuh rơyuh pran jua kơ lŏn ia; ngă tui pran kơtang bruă mă mơ̆ng hlăk ai amăng gum hrŏm pơgang phun akha mơ̆ng Ping gah, hrưn đĭ hơngah lui hơdôm tơlơi pơmin soh mơ̆ng ƀing kơdŏng glăi kơnuk kơna; pơdŏng pơjing khul mơnuih apăn bruă khul sit nik hmâo pran jua klă, hmâo bôh thâo rơgơi. Amăng mông ngă Lơphet hơdor glăi, 100 čô mơnuih apăn bruă khul hlăk ai hmâo pran jua mă bruă hur har na nao, pơčeh phrâo pioh pok pơhai ba glăi bôh tơhnal mơ̆ng bruă khul hăng bruă pơphun hlăk ai tơdăm ngek dra muai čơđai muai./.