Bruă anai djru anom bơwih ƀong, anom ngă ƀong hrom, sang anŏ ngă hmua amăng đơ đam dêh čar pơtruh sĭ mơdrô hăng blơi gơnam tŭ yua. Rơwang hrơi tơjuh gơnam OCOP hăng gơnam hmư̆ hing mơ̆ng kual, plơi pla thun 2023 hơmâo 439 anom bơwih gum pơkra 1.200 mơta gơnam, mơ̆ng anun OCOP hơmâo 756 mơta gơnam hơmâo mă mơ̆ng 3 -5 asar pơtŭ. Amăng rơwang hrơi tơjuh pơdă gơnam ăt hơmâo lu bruă ngă hrŏm jao măi mok boh thâo ia rơgơi pơkra gơnam mơ̆ng hmua hăng đĭ kyar plơi pla; ngă gêh gal brơi anom bơwih ƀôn prong Hồ Chí Minh hăng hơdôm boh tơring čar, ƀôn prong hơduah ĕp, tuh pơ alin hơdôm kơčăo bruă ngă hmua hăng măi mok yơyôm, wơ̆t hăng pơkra gơnam mơ̆ng hmua klă hloh djă anăn mơ̆ng 38 boh tơring čar, ƀôn prong. Mơ̆ng anun, pơsit tơlơi gơgrong bruă pơtruh nao rai tŭ yua, pơtruh sĭ mơdrô yôm mơ̆ng ƀôn prong Hồ Chí Minh amăng bruă ngă hmua mơ̆ng hơdôm kual lŏn amăng dêh čar.

Mơguah lơ 27/10, ƀơi Hà Nội, Anom bruă pơphun hơduah ĕp sĭ mơdrô boh troh đang hmua, Ding jum Bruă hmua hăng Pơđĭ kyar plơi pla ngă hrom sang bruă pơtruh nao rai kual plơi pla mơ̆ng dêh čar, Khul ngă hrŏm sĭ mơdrô ia mơsin gru grua Viêt Nam pơphun sa rơwang hrơi tơjuh lăi pơthâo, pơtruh brơi mơnong ƀong huă Việt Nam brơi kơ djop mơta mơnong sĭ mơdrô ia mơsin ia măm gru grua, hơdôm mơta mơnong ƀong huă jơman phara kual amăng dêh čar.

Anai lĕ mông gêh găl pôr pơthâo hơdră pơkra pơjing ia mơsin, juăt lăi ia măm Việt Nam truh pơ mơnuih blơi ƀong, kiăng thâo hluh rơđah, djă pioh bruă mă pơkra ming mơnong ƀong huă Việt Nam kơ tuai amăng dêh čar hăng dêh čar tač rơngiao. Rơwang hrơi tơjuh anai sa bruă mă tơhnal pơkă mơ̆ng dêh čar man pơdong plơi pla phrâo thun 2023, djru hrŏm sĭ mơdrô, pơtruh nao rai lăi pơthâo sĭ mơdrô ia mơsin, ia măm gru grua hăng mơnong ƀong huă hăng ia mơsin.