Tui hăng tơlơi lăi pơthâo mơ̆ng tơring čar,  sang bruă kơnuk kơna wai lăng gah bruă hmua hăng ayuh hyiăng ăt mă bruă hơđong mơ̆n, samơ̆ hơmâo lu tơlơi phrâo “Dŏ kơđông”. Amăng anun, bruă pơkă hnơ̆ng ling yua lŏn, bruă jao lŏn, apah yua lŏn, duh glăi lŏn sang đang hmua, akŏ pơdong glăi plơi pla phrâo dŏ sư̆ rơbư̆; hơmâo lu hơdră ngă hră pơar amăng kơnuk kơna tơ̆i dơnuai hĭ lơm gong gai kơnuk kơna pơpha tơlơi dưi aka ƀu rơđah rơđong; ƀing tơhan pơgang kyâo glai, tơhan pơjrao hlô mơnong, pơgang phun pla bưp lu tơlơi tơnap tap kơƀah mơnuih mă bruă laih anun prăk blan djru ba aka ƀu lăp; bruă rek ling pơkă hnơ̆ng, akŏ bruă yua lŏn mơ̆ng thun 2026-2030 hlăk kaih hĭ, aka ƀu hơmâo tơlơi pơkă ngă djơ̆ hăng mrô rơnoh pơtruh nao rai; hơdôm bruă pơsir hră pơar rơkâo čih anăn gru anih ngă hmua pla pơjing, gru anih čih anăn dưm gơnam sĭ mơdrô amăng kơdŭng, ngă brơi hră pơgang gơnam sĭ mơdrô pioh pơgang phun pla aka ƀu sa hnơ̆ng, kơƀah hĭ tơlơi pơčrâo ba anun ngă gun kơ bruă ngă hmua pla pơjing, sĭ mơdrô hăng tač rơngiao mơ̆ng lu sang bruă mơdrô tơnap tap hĭ.

Klah čun ƀơi mông mă bruă, Kơ-iăng khua ding jum ngă hmua hăng ayuh hyiăng ơi Phùng Đức Tiến lăng yom bruă prăp lui hlâo pơsir mă bruă či kiăng jăng jai, tơlơi lăi pơthâo tơpă mơ̆ng tơring čar Khánh Hòa amăng bruă lăi pơthâo sit nik tơlơi hơmâo; rơkâo tơring čar Khánh Hòa ăt lăi pơthâo tañ djop, mrô rơnoh pơmut hrŏm sa hnơ̆ng plah wah djop gưl sang bruă, ngă atur kiăng pơtong glăi rơnoh yua lŏn hăng pơkă hnơ̆ng bruă yua lŏn rơnuk phrâo. Djop sang bruă hơmâo tơlơi thâo mơ̆ng Ding jum kiăng ngă hrŏm tơring čar ngă giong hĭ hră pơtô ba, pơčrâo brơi kiăng pơhlom brơi bruă mă git gai wai lăng lŏn glai mơ̆ng kơnuk kơna amăng bruă ngă hmua-pơgang ayuh hyiăng dưi pơphun ngă bruă hruaih hloh, tŭ yua, djơ̆ anŏ kiăng mơ̆ng bruă pơphun jao bruă mă kơ gong gai kơnuk kơna dua gưl.