Sang hră gưl sa Tô Hiệu (plơi prong Buôn Ma Thuột, tơring čar Dak Lak) phrâo hmâo hră lăi pơthâo hơngah čơkă mă bơnga mơ̆ng amĭ ama čơđai ƀrô djơ̆ hrơi hơdor glăi 41 thun Hrơi pioh kơ nai pơtô čơđai Việt Nam. Tui bôh yôm hră anai, truh hrơi pioh kơ nai pơtô, sang hră čơkă mă lu bơnga hơ-ưč hmưi mơ̆ng amĭ ama čơđai, čơđai sang hră. Khă hnun hai, mrô bơnga anai sang hră kơnong kơ mă yua amăng sa dua hrơi laih anun glom lui hĭ, hơ-ưi biă.

Nai Đoàn Thị Tuyết Yến – Khua Sang hră gưl sa Tô Hiệu brơi thâo, sang hră ră anai dô̆ 55 čô čơđai, yua kơ tơlơi hơdip mơda sang anô̆ tơnap anun akă hmâo prăk blơi hră pơgang gah ia jrao. Rơgao kơ hră lăi pơthâo, sang hră čang rơmang hơdôm bôh anom bơwih ƀong, pơ ala kơ brơi bơnga ƀrô djơ̆ hrơi pioh kơ nai pơtô čơđai Việt Nam, sang hră rơkâo pơplih mă hră pơgang gah ia jrao kơ čơđai sang hră tơnap tap. Tơdơi kơ hmâo hră lăi pơthâo mơ̆ng sang hră, hmâo laih 14 čô čơđai čơkă mă tơlơi gum djru. Nua ñu rim hră pơgang gah ia jrao: 631.800 prăk./.