Mơ̆ng mơguah mơtăm, ƀing tơhan pơƀut kih rơmet, duñ pơƀut asuk ruk, kor hlŭ, hyu dloh, bruăi amăng ia rô, rơmet jơlan nao rai amăng plơi, djru ba nao gơnam ƀong huă, sum ao, ia jrao gun kơ mơnuih ƀôn sang dŏ kơđông aka ƀu thâo tơbiă hyu; djru neh met wa pơdong glăi sang, pơkra glăi anih anom răm rai, rơmet rơmot sang anŏ, hơđong glăi tơlơi hơdip tơdơi kơ ia dăo.

Truh mông anai, dua anih dŏ kơđông ƀơi jơlan tơring čar mrô 1 hơmâo brơi rơdêh nao rai laih. Anom bruă ia jrao hơmâo nao khăm, brơi ia jrao soh sel kơ neh met wa, laih dong čơkă pơjrao sa čô čơđai mơ̆ng anih ia dăo kơtang nao pơjrao pơ sang ia jrao. Ơi Nguyễn Cảnh Tùng, Khua Jơnum min mơnuih ƀôn sang să Buôn Đôn brơi thâo, gong gai glăk mă yua jăng jai prăk djru brơi neh met wa ƀơi hơdôm anih dŏ kơđap, prăp lui abăn mơsum, miker, gơnam juăt yua, ia jrao gun kơ neh met wa. Him lăng amăng hơdôm hrơi pơ anăp, lơ̆m ia trun abih kah mơnuih ƀôn sang mơ̆ng dưi pơwơ̆t glăi kih rơmet hăng hơđong glăi tơlơi hơdip.