Thun hrăm anai lĕ thun hrăm blung a Uông Hân ataih mơng sang anŏ yua kơ hrăm dŏ glăi. Hơdôm tơlơi hrăm blung a mơ̆ čơđai hrăm hră anih 6, djuai ania M’nông anai tŭ mă mơng sang hră phrâo anai, ƀu djơ̆ kơnong mơng hơdrôm hră đôč ôh mơ̆ ăt hơmâo wŏt tơlơi pơkă mơng sang hră, kơ boh thâo amăng tơlơi hơdip kơ ñu pô rĭm hrơi. Hơdôm hrơi blung a mut sang hră, ñu juăt dŏp ƀơi tơkai sưng hia yua kơ hning glăi pơ sang đơi. Samơ̆ lơm anun, nai pơtô ăt kiăo tui lăng hăng pơalum pran jua, kiăng ñu hơđong amăng pran jua hăng plai ƀiă hning glăi pơ sang. Tơlơi anai ăt ngă ƀing amĭ amai kar hăng amai H’Yến Bkrông, anai lĕ amĭ amŏ Uông Hân hơđong lơm brơi ñu kiăo tui hrăm ƀơi anai:

“Grup hrăm anih 6 ăt lăi pơthâo brơi nai na nao, tơdah hơmâo bruă hơget amra mơ-it amăng măi telephôn, tơdah hlơi juăt ƀuh hia ƀudah ƀu hơdor tơlơi hrăm, nai amra čih tơlơi mơ-it kiăng kơ ƀing gơmơi thâo rơđah ană bă glăk hrăm hiưm ñu, kiăng hơđong amăng pran jua. Anih hơdip hăng hrăm hră ƀơi anai ăt pơhlôm klă mơn, ƀing gơmơi huăi bơngŏt hơget ôh”.

Bơ ƀing čơđai hrăm anih prong ƀiă, Sang hră kơnuk kơna čem rông ba sang hră  gưl dua tơring glông Lăk ră anai jing anih juăt yơh hăng jing sang dŏ hơdip hrăm hră hrŏm hăng ƀing čơđai. Rĭm čô nai pơtô jing ƀing amĭ ama tal dua lêng kơ jê̆ giăm wai lăng, pơ alum pran jua, gum djru, pơtă pơtă ƀing gơñu hrăm hră. Amon H’Wion Sruk, čơđai hrăm anih 9 brơi thâo:

“Ƀing nai pơtô khăp pap ƀing gơmơi biă mă hăng lêng kơ kiăo tui wai lăng mơng bruă anet hloh anun lĕ klit abăn, kih sang hăng črâo brơi lu tơlơi pơkŏn dong. Kâo lăng anai lĕ tơlơi pơalum pran jua, ăt hning glăi pơ sang mơn samơ̆ hơmâo tơlơi đing nao mơng ƀing nai pơtô tui anai ngă kơ kâo plai ƀiă hning rơngŏt”.

Hăng nai Hoàng Thị Bảy, 16 thun pơtô ƀơi sang hră kơnuk kơna čem rông ba sang hră gưl dua tơring glông Lăk, hrơi mông ñu dŏ glăi pơ sang hră lu ƀiă glăi pơ sang. Nai Bảy brơi thâo, yua anai lĕ sang hră ƀing čơđai dŏ glăi yua anun abih bang ƀing čơđai hrăm hră hăng dŏ glăi mơng hrơi sa truh hrơi năm mơtăm, kơnong rơnuč rơwang hrơi tơjuh kah mơng hơmâo amĭ ama nao pơgiăng glăi, đa lu čơđai tơnap tap, sang ataih, rĭm thun glăi pơ sang hơdôm hrơi đôč. Laih dong, ƀing čơđai lĕ mơnuih djuai ania ƀiă rai mơng lu kual phara tơdah ƀing nai ƀu đing nao jê̆ giăm, gum djru hăng hluh rơđah tơlơi tơnap tap, ƀing gơñu amra mlâo biă mă. Nai Hoàng Thị Bảy brơi thâo:  

“Yua ƀing čơđai lĕ djuai ania phara. Ƀing gơñu pơhiăp nao rai hăng tơlơi djuai ania ƀiă yua anun ƀing gơmơi kiăng thâo ƀơƀiă tơlơi ƀing gơñu pơhiăp. Kiăng kơ hluh ƀing gơmơi ăt pel ĕp hăng hrăm tui kiăng kơ dưi hiăp bit. Tơlơi anai kiăng ba glăi tơlơi jê̆ giăm kiăng ƀing gơñu thâo hluh, thâo djru tơdruă hăng brơi ƀing gơñu ƀuh sang hră kar hăng sang ƀing gơñu mơn”.

Tui Nai Nguyễn Thị Thùy Diễm, Khua sang hră kơnuk kơna čem rông ba sang hră gưl dua tơring glông Lăk, thun hrăm 2023-2024, sang hră hơmâo 152 čô čơđai kiăo tui hrăm. Amăng anun hơmâo 96% lĕ djuai ania ƀiă hăng 8 djuai ania. Lu hloh rai mơng hơdôm să kual ataih, asuek, kual mơnuih djuai ania ƀiă amăng tơring glông. sang anŏ ƀing gơñu tơnap tap biă mă. Yua anun, rĭm čô nai pơtô lêng pơsit, hrŏm hăng bruă pơtô hrăm, bruă wai lăng ăt jing tơlơi gơgrong hăng pran khăp pap. Mông pơtô hrăm, ƀing nai lĕ ƀing mơnuih pơtô brơi boh thâo kơ ƀing čơđai. Giong mông hrăm glăi pơ anih dŏ, ƀing nai jing ƀing amĭ ama wai lăng kar hăng ană bă mơng mông ƀong huă truh pơ pit đih.

“Nai pơtô ăt kar hăng ƀing apăn bruă, kông ñơn lêng kơ kiăo tui lăng na nao ƀing čơđai. Ƀing gơñu rai hrăm mơng anih 6, lăng ăt kar hăng ană bă mơn. Yua anun ƀing nai, ƀing apăn bruă amăng sang hră lêng kơ gum hrŏm kiăng črâo ba djop mơta lơm ƀing čơđai phrâo mut hrăm”.

Mơng tơlơi khăp pap, tơlơi đing nao črâo ba mơng ƀing amĭ ama tal dua anai hơmâo pơtrut pran jua kiăng ƀing čơđai sang hră kơnuk kơna čem rông ba sang hră gưl dua tơring glông Lăk gir kơtir hrăm hră hăng tơlơi čang rơmang “Hrơi anai kiăo tui hrăm ataih, tơlơi hơdip amra hiam klă pơgi kơdih”. Hăng tui jơlan anun, lêng kơ hơmâo tơlơi gum hrŏm, djru ba mơng ƀing nai pơtô./.