Sang hră gưl prong Đaị học Tây Nguyên ră anai, hơmâo 640 čô khua mua, nai pơtô, hơmâo pơtô truh 9000 čô čơđai sang hră gưl prong, hăng 5 mơta pơtô hrăm gưl nai prin tha ta juăt lăi TS, 12 mơta tơlơi hrăm thạc sĩ hăng pơtô hrăm kơ bruă chuyên khoa I, 36 mơta hrăm gưl prong, 1 boh sang hră gưl klâo hăng sa boh sang hră gưl muai pioh pơtô hăng hrăm ba mơtam. Ră anai, sang hră gưl prong Đại học Tây Nguyên hơmâo ngă giong laih hơdră pơtô hrăm pơđĭ boh tŭ yua 3 mơat bruă phun: Pơtô hrăm nai pơtô sang hră gưl sa, pơtô hrăm wai lăng bruă sĭ mơdrô hăng boh thâo ia rơgơi pla pơjing djơ̆ tơhnal pơtrun mơ̆ng Ding jum Pơtô hăng pơjuăt.

Khua mua tơring čar Dak Lak pơyơr guang bơnga bơni hơơč kơ thun hrăm phrâo

Tui hăng Hră pơtrun mrô 23 lơ 6/10/2022 mơ̆ng Ding jum kơđi čar kơ anăp pơđĭ kyar bơwih ƀong huă mơnuih mơnam hăng pơgang tơlơi rơnuk rơnua kual Dap Kơdư truh thun 2030, lăng nao pơ anăp adih thun 2045, sang hră gưl prong Đaị Học Tây Nguyên ră anai sa amăng hơdôm boh yôm phun đing nao pơđĭ kyar. Sang hră gưl prong Đại học Tây Nguyên pơsit bruă mă phun mơ̆ng sang hră anai lĕ kơtưn  wai lăng pơtô hrăm gưl prong, ngă kjăp dăp bruă khua mua, nai pơtô pơhrăm hơbôt hloh, tŭ yua, kơtưn ba yua boh thâo ia rơgơi tơlơi pơhing amăng bruă wai lăng hăng pơtô hrăm.