Sang pơdă gơnam gru Hoàng Sa ƀơi jơlan Hoàng Sa, sa amăng hơdôm arăt jơlan ter hang ia rơsĭ hiam hloh či phường Thọ Quang, kuân Sơn Trà, ƀôn prong Đà Nẵng. Hơdôm hrơi hăng anai, hơmâo lu čơđai sang hră djop gưl, čơđai gưl prong, hlăk ai, ƀing tơhan hơđăp, tuai rơnguai amăng dêh čar hăng tač rơngiao, hrŏm hăng lu mơnuih khăp kơ tơlơi rơnuk rơnua mơak laih anun bă hăng tơlơi khăp kơ bul pơtâo plao ia rơsĭ nao ĕp lăng, hơduah tơña. Nao ĕp lăng rup, hră pơar čih ră ruai kơ Hoàng Sa, Trường Sa hơmâo pơdă amăng sang pơdă gơnam gru Hoàng Sa, gơyut Lê Khánh Lý, čơđai sang hră gưl prong hrăm bruă ngă nai Đà Nẵng lăi:

“Jing ƀing čơđai rơnuk anai rai ĕp lăng Sang pơdă gơnam gru Hoàng Sa, sa wơ̆t dơ̆ng kâo thâo hluh rơđah kơ tơlơi dưi ngă pô bul pơtâo, plao ia rơsĭ dêh čar, biă mă ñu hăng 2 boh bul pơtâo plai ia rơsĭ Hoàng Sa hăng Trường Sa. Ƀing čơđai rơnuk anai kah hăng ƀing gơmơi kiăng pơđĭ tui tơlơi thâo hluh, pơtô ba mơnuih jum dar ta pô ăt thâo pơsit tong tơlơi dưi ngă pô yôm pơphăn biă mă kơ lŏn ia ta. Hoàng Sa hăng Trường Sa lĕ Việt Nam yơh ngă pô”.

Hơdôm pok hră rek ling guai juăt lăi hră lơkak, hră pơar čih pioh mơ̆ng đưm đă, sui hăng anai rơgao hơdôm rơtuh thun hăng rup djă pioh rim asar čuah, boh pơtâo, kơđuh ačung, ƀriăng, apŭi, abao ia rơsĭ…djop mơta bruă mă pong hlă gai pơkă guai, pơdong pơnăng čih anăn pô mơ̆ng Việt Nam ƀơi 2 boh plao ia rơsĭ, bul pơtâo Hoàng Sa hăng Trường Sa dŏ djă pioh djop djel. Anai yơh hơdôm kơnôl djă pioh djơ̆ găl jing Việt Nam ngă pô sit nik hăng dua boh bul pơtâo plao ia rơsĭ Hoàng Sa; tơlơi gơgrong ba, anih dŏ, anŏ yôm mơ̆ng kual ia rơsĭ hơmâo bul pơtâo plao amăng ia rơsĭ yôm biă mă man pơdong hăng pơgang lŏn ia. Trung úy Lê Xuân Thiêm, Kơ-iăng khua grup jak iâu pơtô lăi ană plơi pla, Puih kơđông tơhan pơgang guai dêh čar ƀơi Sơn Trà, ga Anom bruă khua tơhan pơgang guai dêh čar mơ̆ng ƀôn prong Đà Nẵng brơi thâo:

“Thun blan rơgao, khua mua, ling tơhan puih kơđông tơhan pơgang guai lŏn ia či Sơn Trà ngă hrŏm djop anom bruă ping gah, gong gai kơnuk kơna plơi pla, djop anom bruă pơdjơ̆ nao pơphun re se mông pơtô pơblang. Kơnang kơ hơdôm wơ̆t pơtô pơblang djơh hăng anun, ƀing gơmơi lăi pơthâo tơlơi thâo thăi, boh yôm phun pơdjơ̆ nao kơ bul pơtâo plao ia rơsĭ mơ̆ng Việt Nam. Ƀing gơmơi ăt pơphun re se hơdôm hơdră djru ba tơlơi hơdip mơda mơnuih mơnam, kah hăng djru ba mơnuih ƀôn sang hyu mă akan hơdang amăng ia rơsĭ nao pơ ataih kiăng dŏ glăi pơgang jơlan guai dêh čar, hơđong pran jua pơgang tơlơi dưi ngă pô bul pơtâo plao ia rơsĭ dêh čar Việt Nam”.

Sang pơdă gơnam gru Hoàng Sa yua kơ jơnum min mơnuih ƀôn sang tơring glông Hoàng Sa, ƀôn prong Đà Nẵng wai lăng. Lan sang anai gah anăp, anăp nao pơ ia rơsĭ Ngŏ, dưi man pơdong ƀơi anih rơhaih 1.300 met karê. Ring bruă anai, ba yua mơ̆ng blan 3/2018, pok bah amăng brơi tuai mut ĕp lăng soh sel ƀu apah prăk ôh. Rĭm thun pơ anai hơmâo čơkă hơdôm hơpluh rơbâo wơ̆t tuai hăng mơnuih ƀôn sang ep lăng, kiăng thâo gru phun dêh čar. Rơbêh 300 amăng mrô hơdôm hơpluh rơbâo mơta rup, hră pơar čih glăi phun akha ba pơdă pơ anai, jing kơnôl hơdip lăi nao tơlơi dưi ngă pô bul pơtâo plao ia rơsĭ Việt Nam hăng 2 boh plao Hoàng Sa laih anun Trường Sa. Ơi Lê Tiến Công, khua anom bruă kơ jơnum min mơnuih ƀôn sang tơring glông Hoàng Sa, Khua Sang bruă pơdă gơnam gru Hoàng Sa brơi thâo:

“Kiăng bơwih brơi kơ tuai hăng mơnuih ƀôn sang mut ĕp hơduah tơña kơ bul pơtâo Hoàng Sa klă hloh, ƀing gơmơi hơmâo akŏ bruă hăng pok pơhai kơčăo bruă čih anăn ngă mrô abih, dưm hră pơar, rup rap, tơlơi pơhing hăng anih pơdă gơnam gru ƀơi Sang pơdă gơnam gru Hoàng Sa, čih pơmut amăng plang internet, website mơ̆ng sang bruă gơmơi kiăng mơnuih ƀôn sang mut ĕp lăng tơlơi pơhing ngă pô mơ̆ng Việt Nam hăng bul pơtâo Hoàng Sa”.

Ơi Võ Ngọc Đồng, Khua Gơnong bruă čar ƀôn prong ngă rah Khua jơnum min mơnuih ƀôn sang tơring glông Hoàng Sa, ƀôn prong Đà Nẵng lăi:

“Ƀing gơmơi git gai Sang bruă pơdă gơnam gru Hoàng Sa dăp hơdră, pơkra bruă či ngă kiăng pơtrut hyu pơtô pơblang brơi mơnuih ƀôn sang thâo hluh hăng gơgrong hloh amăng bruă ngă pô bul pơtâo Hoàng Sa. Ƀing gơmơi pơlir hơbit lu bruă mă pơtô lăi rah hăng pơphun bruă hyu čuă jơmư, ĕp lăng, čih pioh, ba glăi pơdă lui kiăng pơtô hrăm gru phun dêh čar, ƀôn prong brơi djop sang hră ngă tui. Gơmơi ngă hrŏm anom bruă tơdăm dra mut phung ƀôn prong, Gơnong bruă Pơtô hăng Pơjuăt, Gơnong bruă tuai čuă ngui hyu ĕp rup hăng hră pơar čih glăi kơ Hoàng Sa, kiăng brơi tuai amăng dêh čar tač rơngiao ĕp lăng. Biă mă ñu, pơphun pơdă gơnam ba hyu pơdah brơi ƀơi djop sang hră gưl prong, sang hră djop gưl hrăm kiăng ƀing čơđai sang hră, tơdăm dra hrăm gưl prong thâo ƀuh, ĕp lăng kơnôl kơ gru phun, ngă anŏ pơkă găl ăt kah hăng bruă hơmâo sit nik kơ tơlơi dưi ngă pô Hoàng Sa”.

Hoàng Sa hăng Trường Sa mơ̆ng đưm đă ră hlâo laih, sa črăn ƀu dưi člah ôh hăng lŏn ia, dêh čar Việt Nam. Việt Nam hơmâo djop kơnôl pơkă, bruă mă djơ̆ lăp pơthâo gru phun, hơmâo hră pơar tơlơi phiăn pơtrun laih anun lu wơ̆t pôr pơthâo, lăi pơtong, tơlơi dưi ngă pô hăng 2 boh plao, bul pơtâo ia rơsĭ Hoàng Sa laih anun Trường Sa.