Hơmâo akŏ pơdong amăng thun 2021 yua kơ ƀing mơnuih thun hlăk ai pơphun, Kông ti sĭ mơdrô Epis, tơring glông M’Drăk, tơring čar Dak Lăk, sĭ mơdrô djŏp djuai ia phong phơn pik ƀô̆ hơmâo pơkra mơ̆ng gơnam hơmâo hơđăp amăng glai klô. Kiăo tui boh tŭ yua mơ̆ng boh thâo mrô, ƀing hlăk ai hơmâo hơduah ĕp jê̆ giăm mơnuih blơi tui plang internet hăng čih anăn gơnam ƀơi glông sĭ mơdrô điện tử. Amai Lê Thị Hồng Thơm, Kơ-iăng khua kông ti brơi thâo: Ră anai gơnam mơ̆ng anom bơwih ƀong hơmâo ƀơi abih bang glông sĭ mơdrô điện tử juăt hơmâo lu mơnuih yua kah hăng: Shoppee, tiki, lazada, tiktokshop...Tơlơi anai djru anom bruă gơñu plai ƀiă prăk apah arăng ba pơƀuh gơnam.

“Jing sa anom bơwih ƀong phrâo ngă bruă anun ăt hơmâo lu tơlơi aka ƀu hơđong, kơ prăk apah yua anih sĭ, anun jing sĭ tui glông sĭ mơdrô điện tử hăng internet klă biă, djru kơ ƀing gơmơi plai ƀiă rơngiă prăk apah anih sĭ mơdrô ƀudah hơdôm mơta prăk pơkŏn mơ̆ anom bơwih ƀong gơmơi aka ƀu hơmâo”.

Ăt ruah bruă hơduah ĕp mơnuih blơi hăng pok prong anih sĭ mơdrô mơ̆ng tơlơi gêh gal mơ̆ng sĭ mơdrô điện tử, Kông ti sĭ mơdrô Kim Long, ƀơi tơring glông Krông Ƀuk, tơring čar Dak Lăk hmao tlôn dong tah ĕp ƀuh lu mơnuih blơi gơnam mơ̆ng lu tơring čar ƀôn prong. Ơi Đỗ Ngọc Anh, pô pơ ala kơ anom bơwih ƀong hrơi thâo:

“Gơnam mơ̆ng gơmơi lĕ gơnam phrâo, sit hnun yơh kâo kiăo tui sĭ mơdrô online yơh phun. Ñu pơhrui glăi 50% mrô prăk sĭ mơdrô mơ̆ng hơdôm glông internet, website sĭ mơdrô mơ̆ng gơmơi. Sit hnun mơn, bruă mă yua website ăt kah hăng online amăng bruă sĭ mơdrô yôm biă mă amăng bruă sĭ mơdrô”.

Tui hăng ơi Hoàng Minh Ngọc Hải, Khua anom bruă pơtruh hăng pơplih mrô Khul anom bơwih ƀong tơring čar Dak Lăk, mrô jŭ yap ră anai 70% mrô mơnuih Việt Nam thâo yua internet laih anun lu biă mă ñu ƀing hlăk ai. Blơi gơnam tui glông sĭ mơdrô điện tử jing juăt laih. Anom bơwih ƀong dưi ĕp ƀuh lu mơnuih kiăng blơi gơnam. Khul hơmâo lu jơlan hơdră hơmâo ba ngă, djru ba hơdôm anom bơwih ƀong Dak Lăk pơtruh nao rai sĭ mơdrô gơnam, biă ñu lĕ gơnam mơ̆ng hmua sĭ amăng internet. Ơi Hoàng Minh Ngọc Hải brơi thâo:

“Ƀing gơmơi pok prong hăng pơtruh nao rai hăng rơbêh 28 anom bruă mă yua boh thâo măi mok pơkra anih sĭ mơdrô klă, dưi pơhno đah mơ̆ng djru anom bơwih ƀong ngă bruă klă hloh. Hơdôm hơdră anai ăt pơƀuh anŏ hơgŏm hăng boh tŭ yua. Lơ̆m anom bơwih ƀong ngă hrŏm hăng hơdôm anom apăn bruă, ăt kah hăng iâu pơthưr pơplih tơlơi pơmin ngă bruă amăng ƀrư̆ lĕ kâo kơnang anom bơwih ƀong amra dưi găn rơgao tơlơi tơnap mơ̆ng sĭ mơdrô điện tử, laih anun dưi ngă truh kih bruă sĭ mơdrô mă yua mrô”.