Mrô rơnoh anai, dưi lăi pơthâo ƀơi mông jơnum pơƀut bruă mă thun 2025, pok pơhai bruă mă thun 2026 mơ̆ng Gơnong bruă Gru grua, Pơrơguăt drơi jăn hăng Tuai čuă ngui Dak Lak. Bruă čơkă tuai hyu ngui ƀơi Dak Lak yak nao amăng bruă pơblih kơtang hăng rơnoh pơhrui glăi rơbêh 13.600 klai prăk, đĭ hloh 8% tui akŏ bruă jao. Mrô wơ̆t tuai nao ngui hơmâo 7 klăk 300 rơbâo, đĭ tui 16% pơkă hăng akŏ bruă jao.

Đơ đam tơring čar hơmâo 782 anih pơdơi pơdă, đĭ tui lu hloh 34 boh sang jưh tuai, anih pơdơi pơdă pơkă hăng thun 2024, pơjing rai atur pioh pơhưč ƀing tuai hyu ngui jing anom bruă bơwih ƀong huă ƀơi tơring čar. Thun 2026, tơring čar Dak Lak pơtong rơđah, bruă čơkă tuai jing bruă mă yom, khom đing nao kơ anih dŏ, gru grua hiam, tơlơi phiăn đưm hăng ană mơnuih djuai ania hăng anih dŏ mơnuih mơnam hiam klă; đing nao pơphun tơlơi ngui ngor mơak hlak gru grua hiam, pơrơguăt drơi jăn, pok pơhai tŭ yua Thun čơkă tuai tơring čar Dak Lak thun 2026, mơ̆ng anun pơjing pran jua pơtrut rơnoh pơđĭ kyar bơwih ƀong huă hăng pơđĭ kyar kơjăp amăng rơnuk phrâo.