VOV4.Jarai - Mơguah lơ 12/10 pơ anăp, ƀơi Hà Nội amra pơphun tal hơdor glăi hrơi ƀing bơwih ƀong sĭ mơdrô Việt Nam (13/10) hăng pơpŭ “mơnuih bơwih ƀong sĭ mơdrô rơgơi" thun 2022. Anai lĕ tơlơi pơhing ba tơbiă amăng mông jơnum hăng ƀing mă tơlơi pơhing phrâo mơguah lơ 6/10 mơng Khul pơlir hơbit sĭ mơdrô hăng tuh tia pơkra pơjing Việt Nam (VCCI). Amăng mông jơnum hăng ƀing mă tơlơi pơhing, Khua VCCI ơi Phạm Tấn Công lăi pơthâo hơdôm bruă yôm phăn sit nik pioh čơkă hrơi mơnuih bơwih ƀong sĭ mơdrô Việt Nam lơ 13/10 thun anai.

Khua VCCI ơi Phạm Tấn Công git gai mông jơnum

Amăng anun, hơmâo 2 bruă yôm phăn lĕ Jơnum bơkơtuai boh thâo “Tơlơi hơdip hiam mơng mơnuih bơwih ƀong sĭ mơdrô hăng gru grua hiam mơng mơnuih bơwih ƀong sĭ mơdrô Việt Nam amăng rơnuk phrâo” hăng tal hơdor glăi hrơi mơnuih bơwih ƀong sĭ mơdrô Việt Nam laih dong pơpŭ “Mơnuih bơwih ƀong sĭ mơdrô Việt Nam rơgơi” thun 2022. Khul pơphun amăng mông jơnum hăng ƀing mă tơlơi pơhing phrâo ăt brơi thâo kơ “tơlơi yôm” phrâo mơng ƀing mơnuih bơwih ƀong sĭ mơdrô rơgơi. Tui anun, hơmâo 6 anŏ pơhrô̆p brơi 6 tơlơi pơkă tui gru grua hơdip hiam mơng mơnuih bơwih ƀong sĭ mơdrô Việt Nam yua VCCI lăi pơthâo: Ba glăi tơlơi yôm amăng bơwih ƀong huă mơnuih mơnam; ngă tui tơlơi phăn: tong ten, bơkơnar, tơpă sit; thâo pơčeh phrâo, ngă hrŏm, pơđĭ kyar; lăng yôm ayuh hyiăng rơhuông adai; khăp kơ lŏn ia, hơdip hiam hrŏm abih bang mơnuih laih dong amăng sang anŏ.

VOV/Siu Đoan: Pơblang