Kơčăo bruă tuh pơ alin čuk pơkra jơlan rơdêh đuăi hmar Khánh Hòa-Ƀuôn Ma Thuôt hơmâo boh glông ataih 117 km. Amăng anun črăn găn nao pơ tơring čar Khánh Hòa lĕ rơbêh 32,7 km, rơnoh prăk tuh pơ alin 5.600 klai prăk. Kơčăo bruă anai pơphun čuk pơkra mơ̆ng blan 6/2023, him lăng truh thun 2026 amra giong.

Truh ră anai, pô anom bruă čuk pơkra jơlan hơmâo klơi hnoh ia plăng dua bơnah jơlan, pơbŭ lŏn găn čroh hnoh, prăk jao mă yua črăn gah tơring čar Khánh Hòa ba yua 71% laih tui akŏ bruă jao amăng thun 2023. Kiăng dưi pok pơhai kơčăo bruă anai, kiăng tañ duh glăi lŏn hmua, đang sang abih bang truh 230 ha hăng 970 boh sang anŏ bơbeč yua. Giăm hơmâo 23 ha đơ đam lŏn glai kiăng pơblih hơdră ba yua hnun kah gêh găl dưi čuk pơkra jơlan.